रोल्पा : रोल्पाको त्रिवेणी गाउँपालिका–४ निगालपानीस्थित सार्वजनिक जग्गामा आफैं उम्रिएको गाँजाको बोट प्रहरीले नष्ट गरेको छ । जिल्ला प्रहरी कार्यालय रोल्पाका अनुसार आइतबार बिहान प्राप्त सूचनाका आधारमा प्रहरी चौकी जुगारबाट प्रहरी नायब निरीक्षक राजबहादुर थापा क्षेत्रीको कमाण्डमा पाँच सदस्यीय प्रहरी टोली गाँजाको बोट फँडानीमा खटिएको थियो ।
टोलीले करिब एक रोपनी क्षेत्रफलमा फैलिएको सार्वजनिक जग्गामा उम्रिएको २ सय जति गाँजाको बिरुवा फँडानी गरी नष्ट गरेको जनाएको छ । गाँजा उम्रिएको स्थान प्रहरी चौकी जुगारबाट करिब १६ किलोमिटर पश्चिममा पर्ने प्रहरीले जनाएको छ ।
लागूऔषध नियन्त्रण तथा अवैध गाँजा खेती नियन्त्रण अभियानअन्तर्गत गाँजाको बोट नष्ट गरिएको र घटनाबारे थप अनुसन्धान भइरहेको जिल्ला प्रहरीले जनाएको छ । रोल्पामा प्रहरीले बेलाबेला गाँजा र अफिमको बोट नष्ट गर्दै आएको छ ।
प्रतिक्रिया दिनुहोस !
