पेरिसः बेलायतबाट मात्र यसपटक युरोकपको नकआउट चरणमा चारवटा राष्ट्रले स्थान पक्का गरे । बेलायतबाट सहभागी भएका सबै टोली इङ्ल्यान्ड, वेल्स, उत्तरी आयरल्यान्ड र आयरल्यान्डले समूहगत चरण पार गरे ।
युरोकपमा बेलायतबाट यति धेरै राष्ट्रले सहभागिता जनाएको यो पहिलो पटक थियो । इङ्ल्यान्ड र वेल्स समूहको शीर्ष दुईमा रहेर अन्तिम १६ मा पुगे । उत्तरी आयरल्यान्ड र आयरल्यान्ड भने तेस्रो स्थानमा आउने उत्कृष्ट चार टोलीभित्र पर्दै प्रिक्वार्टरफाइनलमा पुग्न सफल भएका हुन् ।
युरोकपमा पहिलो पटक २४ टोलीले सहभागी भएका हुन् । यसअघिका संस्करणमा १६ टोलीमात्र सहभागी हुन्थे । यसपटक सहभागी टोलीलाई ६ वटा समूहमा विभाजन गरिएको छ । समूहको शीर्ष दुई टोली र ६ वटा समूहबाट तेस्रो स्थानमा आउनेमध्ये उत्कृष्ट चार टोलीले नकआउट चरणमा स्थान बनाउने प्रावधान छ ।
बेलायतबाट स्कटल्यान्डले मात्र यस पटक युरोकपमा स्थान बनाउन सकेको थिएन । वेल्स र इङ्ल्यान्ड एउटै समूहमा भए पनि दुवै अगाडि बढे । वेल्सले दुई जित र एक हार तथा इङ्ल्यान्डले एक जित र दुई बराबरीको नतिजा निकाल्यो । नकआउट चरणमा भने वेल्सले उत्तरी आयरल्यान्ड र इङ््ल्यान्डले आइसल्यान्डको सामना गर्नेछन्।
उत्तरी आयरल्यान्ड र वेल्स दुवै पहिलो पटक युरोकपमा सहभागी भएका हुन् । समूह ‘सी' मा रहेको उत्तरी आयरल्यान्ड एक जित र दुई हारको नतिजामा अगाडि बढेको हो । ग्रुप अफ डेथमा रहेको आयरल्यान्डले पनि उक्त चुनौती पार ग¥यो । आयरल्यान्ड एक जित, एक बराबरी र एक हारको नतिजामा अगाडि बढेको हो । आयरल्यान्डले अब आयोजक फ्रान्सको सामना गर्नेछ । बेलायतका कुनै पनि राष्ट्रले हालसम्म युरोकपमा फाइनलसम्मको यात्रा तय गर्न सकेका छैनन् ।
पहिलो सहभागितामै सनसनी
जारी युरोकपमा ६ वटा टोली पहिलो पटक नकआउट चरण पुगेका हुन् । यो सफलता हात पार्ने टोलीमध्ये चार टोलीको पहिलो युरोकप सहभागिता हो । स्लोभाकिया, वेल्स, उत्तरी आयरल्यान्ड र आइसल्यान्ड पहिलो पटक युरोकपमा सहभागी भएका हुन् । युरोकपमा पहिलो पटक सहभागी भएको अल्बानिया भने गोलअन्तरमा पछाडि परेपछि अगाडि बढ्न सकेन ।
उत्तरी आयरल्यान्ड र आयरल्यान्डजस्तै स्लोभाकिया पनि उत्कृष्ट तेस्रो टोलीका रूपमा अगाडि बढ्न सफल भयो । समूहगत चरणको समाप्तिपछि तेस्रो स्थानमा आउने उत्कृष्ट टोलीको सूचीमा स्लोभाकिया शीर्ष स्थानमा रह्यो । समूहगत चरणमा स्लोभाकियाले एक जित, एक बराबरी र एक हारको नतिजा निकाल्यो । स्लोभाकियाले अब नकआउट चरणमा विश्वकप विजेता जर्मनीको सामना गर्नेछ । स्लोभाकिया यसअघि एकपटक सन् २०१० मा विश्वकपको नकआउट चरणमा पुगेको थियो ।
आइसल्यान्ड पनि पहिलो पटक युरोकपमा सहभागी भएको हो । आइसल्यान्डले युरोकपको सहभागितामै कीर्तिमान बनाइसकेको छ । युरोकपमा सहभागी हुने सबैभन्दा कम जनसंख्या भएको देशका रूपमा आइसल्यान्डले कीर्तिमान बनाएको हो । आइसल्यान्डको जनसंख्या करिब तीन लाख ५० हजार छ । आइसल्यान्डले पहिलो चरणमा एक जित र दुई बराबरीको नतिजा निकाल्यो । आइसल्यान्डले अब प्रिक्वार्टरफाइनलमा इङ्ल्यान्डको सामना गर्नेछ ।
पोल्यान्ड भने युरोकपमा तेस्रो सहभागितामा पहिलो पटक नकआउट चरणमा पुगेको हो । पोल्यान्डले पहिलो पटक सन् २००८ मा युरोकप खेलेको थियो । यसपटक पोल्यान्डले समूहगत चरणमा दुई जित र एक बराबरी खेलेर समूहको उपविजेता बन्यो । जर्मनीसँग समान अंक भए पनि पोल्यान्ड गोलअन्तरमा पछाडि पयो ।
विश्व विजेतासमेत रहेको जर्मनीसँग पोल्यान्डले बराबरी खेलेको थियो । आयरल्यान्ड पनि तेस्रो सहभागितामा नकआउट चरण पुगेको हो । आयरल्यान्डले यसअघि सन् १९८८ र सन् २०१२ मा सहभागिता जनाए पनि नकआउट चरणको यात्रा तय गर्न सकेको थिएन ।
नकआउट चरणमा पुग्ने हंगेरीको विगत भने रमाइलो छ । युरोकपमा यसअघि दुई पटक मात्र सहभागी भएको हंगेरी दुवैमा सेमिफाइनलसम्म पुगेको थियो । हंगेरी ४४ वर्षपछि यसपटक युरोकपमा सहभागी भएको हो । बेल्जियम पनि ३६ वर्षपछि यो प्रतियोगिताको नकआउट चरण पुगेको हो । बेल्जियम १६ वर्षपछि यसपटक यो प्रतियोगितामा सहभागी थियो ।
गोल अन्तर निर्णायक
समूहगत चरणमा चार उत्कृष्ट टोलीका लागि कडा प्रतिस्पर्धा रह्यो । ६ समूहमध्ये दुईवटा तेस्रो टोलीको समान चार अंक भयो भने चार टोलीको समान तीन अंक रह्यो । स्लोभाकिया र आयरल्यान्डले समान चार अंक जोडे । अन्य तेस्रा टोली पोर्चुगल, उत्तरी आयरल्यान्ड, टर्की र अल्बानियाको समान तीन अंक रह्यो । पोर्चुगल र उत्तरी आयरल्यान्डको गोलअन्तर शून्य रह्यो । पोर्चुगल जारी प्रतियोगितामा तीनवटै खेल बराबरी खेलेर अगाडि बढ्ने एकमात्र टोली बन्यो ।
यस पटक समूहगत चरणमा नौ टोली अपराजित रहे र ती सबै नकआउट चरण पुगे । समूह ‘ए' मा फ्रान्सले दुई जित र एक बराबरी तथा स्विट्जरल्यान्डले एक जित र दुई बराबरीको नतिजा निकाले । समूह ‘बी' मा अपराजित हुने एकमात्र टोली इङ्ल्यान्ड एक जित र दुई बराबरीको नतिजासहित समूहको उपविजेता बन्यो ।
समूह ‘सी' मा विजेता बनेको जर्मनी र उपविजेता बनेको पोल्यान्ड समान दुई जित र एक बराबरीको नतिजासहित अपराजित रहे । क्रोएसिया दुई जित र एक बराबरीको नतिजासहित समूह ‘डी' मा अपराजित रह्यो । समूह ‘एफ' मा तीन टोली अपराजित रहे । हंगेरी र आइसल्यान्ड दुवैले समान एक जित र दुई बराबरी खेले भने पोर्चुगल तीनवटै खेलमा बराबरीमा रोकियो ।
प्रतिक्रिया दिनुहोस !
