काठमाडौं: शेरबहादुर खड्का स्मृति प्रतिष्ठानको आयोजनामा यती फ्लोरिङ राष्ट्रिय महिला भलिबल प्रतियोगिता असार १२ देखि १५ गतेसम्म हुने भएको छ ।
प्रतियोगितामा नेपालका चर्चित टोली एपीएफ, नेपाल पुलिस क्लब, त्रिभुवन आर्मी क्लब, न्यु डायमण्ड, पश्चिमाञ्चल र जाउलाखेल भलिबल प्रशिक्षण केन्द्रको सहभागिता रहने बिहीबार आयोजित पत्रकार सम्मेलनमा प्रतियोगिता संयोजक जगदीश भटृले जानकारी दिए ।
सहभागी टोलीलाई दुई समूहमा विभाजन गरिएको छ । लिगकम नकाउटका आधारमा खेलाइने प्रतियोगिताका खेलहरू राष्ट्रिय खेलकुद परिषद्को कभर्ड हलमा हुनेछ ।
नेपाल भलिबल संघको प्राविधिक सहयोगमा सञ्चालन हुने प्रतियोगिताको विजेताले एक लाख रुपैयाँ, उपविजेताले ६० हजार रुपैयाँ र तेस्रो हुनेले ४० हजार रुपैयाँ पुरस्कार प्राप्त गर्नेछन् । प्रतियोगिताको उत्कृष्ट खेलाडीले १५ हजार रुपैयाँसहित बुद्ध एयरको माउन्टेन फ्लाइट टिकट प्राप्त गर्नेछन् ।
यसैगरी विधागत विधाका उत्कृष्ट, स्पाइकर, क्विकर, ब्लकर, सेटर, डिफेन्स र सर्भरलाई जनही तीन हजार रुपैयाँ पुरस्कार प्रदान गरिने प्रतिष्ठानका अध्यक्ष रञ्जन खड्काले जानकारी दिए ।
प्रतिष्ठानले आगामी वर्षदेखि प्रतियोगितालाई थप बृहत् बनाउने जनाएको छ । प्रतियोगितालाई भव्यताका साथ सफल पार्न नेपाल भलिबल संघका सचिव जगदीश भट्ट संयोजक र कोषाध्यक्ष सुनकेशरी माली सचिव रहने आयोजक कमिटी गठन गरिएको छ । प्रतियोगिता सम्पन्न गर्न १२ लाख रुपैयाँ लाग्ने जानकारी पनि खड्काले दिए ।
प्रतिक्रिया दिनुहोस !
