एजेन्सीः युरोकप फुटबल प्रतियोगिताअन्तर्गत आइतबार हुने प्रिक्वार्टरफाइनल चरणको दुई महत्वपूर्ण खेलमा विश्वविजेता जर्मनी र आयोजक फ्रान्स उत्रँदैछन् ।
साँझ लियोनमा हुने खेलमा फ्रान्सले आयरल्यान्ड र लिल्लेमा राति हुने खेलमा जर्मनीले स्लोभाकियाको चुनौती सामना गर्दैछ ।
आयरल्यान्ड र स्लोभाकियाले नकआउट चरण खेल्न लागेको यो पहिलोपटक हो । उपाधिको दाबेदार मानिएका फ्रान्स र जर्मनी दुवैले समूहगत चरणमा मध्यम प्रदर्शन गरे ।
फ्रान्सले समूह ‘ए'बाट अपराजित रहँदै विजेताका रूपमा नकआउट चरणको यात्रा तय गर्दा जर्मनी पनि समूह ‘सी'को विजेताकै रूपमा अगाडि बढेको हो ।
यस क्रममा फ्रान्सले विपक्षी टोलीविरुद्ध चार गोल गर्दै आफूले पनि एक गोल बेहोरेको छ । जर्मनीले भने प्रतिद्वन्द्वीविरुद्ध तीन गोल गर्दा कुनै पनि गोल बेहोरेन । दुवै टोलीले प्रिक्वार्टरफाइनलमा स्थान सुरक्षित गर्न समान दुई जित र एक बराबरीको नतिजा निकाले । फ्रान्सले रोमानियालाई २-१ र अल्बानियालाई २-० गोलले हराएको थियो भने स्विट्जरल्यान्डस“ग गोलरहित बराबरी खेलेको थियो ।
जर्मनीले युक्रेनलाई २-० र उत्तरी आयरल्यान्डलाई १-० गोलले पराजित गर्यो भने पोल्यान्डस“ग गोलरहित बराबरी खेलेको थियो ।
स्लोभाकियाले चेकोस्लोभाकियाबाट छुट्टिएपछि पहिलोपटक युरोकपमा छनोट भएको हो । उसले पहिलो प्रयासमै प्रिक्वार्टरफाइनलको यात्रा तय गरेको छ । यसअघि युरोकपमा दुईपटक सहभागिता जनाएको आयरल्यान्डले पहिलो चरण पार गर्न सकेको थिएन ।
स्लोभाकिया र आयरल्यान्ड दुवैका लागि प्रिक्वार्टरफाइनल यात्रा त्यति सहज भने रहेन । समूह ‘ई'को आयरल्यान्ड र समूह ‘बी'को स्लोभाकिया तेस्रो स्थानमा रहने टोलीमध्ये उत्कृष्ट ठहरिँदै अगाडि बढेका हुन् । यद्यपि समूह चरणमा यी दुवै टोलीले केही सन्सनीपूर्ण नतिजा निकाले ।
आयरल्यान्डले इटालीजस्तो बलियो टोलीलाई १-० गोलले पराजित ग¥यो भने स्विडेनसँग १-१ गोलको बराबरी खेल्यो। स्लोभाकियाले पनि रुसलाई २-१ गोलले हरायो भने इंग्ल्यान्डसँग गोलरहित बराबरीमा रोक्न सफल भएको थियो । त्यसैले ठूला टोलीविरुद्ध सशक्त प्रदर्शन गर्नसक्ने क्षमताका यी दुई टोलीसँग फ्रान्स र जर्मनीलाई सचेत रहनुपर्नेछ ।
आयरल्यान्ड र स्लोभाकियाविरुद्ध यसअघि भएका प्रतिस्पर्धाको नतिजा भने फ्रान्स र जर्मनीतर्फ नै गएको छ । आयरल्यान्डविरुद्ध हालसम्म भएका १६ भिडन्तमध्ये फ्रान्सले छ खेलमा जित हात पारेको छ । आयरल्यान्डले मात्र चार खेलमा जित हात पार्दा बाँकी ६ खेल बराबरीमै टुंगिएका छन् ।
फ्रान्सले धेरै जित हात पारे पनि ती जितमा पर्याप्त गोल गर्न भने सकेको छैन । फ्रान्सले विरुद्धमा १८ गोल गर्दा १४ गोल पनि बेहोरिसकेको छ ।
स्लोभाकियाविरुद्ध जर्मनीको नतिजा भने निकै राम्रो छ । जर्मनी र स्लोभाकियाबीच हालसम्म २८ पटक प्रतिस्पर्धा हुँदा जर्मनीले १७ पटक जित हात पारेको छ । स्लोभाकियाले ६ खेलमा मात्रै जित हात पारेको छ । बाँकी खेल बराबरीमै टुंगिएका छन् ।
जर्मनीले यी प्रतिस्पर्धामा स्लोभाकियाविरुद्ध गोल पनि प्रशस्तै गरेको छ । जर्मनीले स्लोभाकियाविरुद्ध ६२ गोल बेहोर्दा ४० गोलमात्रै बेहोरेको छ । शनिबारको खेलअघि चारवटै टोलीलाई खेलाडीको चोटको चिन्ता छैन ।
प्रतिक्रिया दिनुहोस !
