इटहरीः जिल्लाको शान्ति सुरक्षाको नेतृत्व सम्हालेका सुनसरीका प्रमुख जिल्ला अधिकारी मोहनबहादुर चापागार्इँले जिल्लाभर चन्दा आतंक मच्चाएका छन् ।
शक्तिको दुरुपयोग गर्दै प्रजिअ चापगाईँले विभिन्न सरकराी कार्यालय र उद्योगी व्यवसायीहरुसँग आर्थिक सहयोगका नाममा जबरजस्ती चन्दा आतंक मच्चाएपछि सुनसरीका अधिकांश सरकारी कार्यालयका प्रमुखहरु तथा उद्योगी व्यवसयीहरु त्रसित बनेका छन् ।
जागिरबाट अवकास हुन लागेपछि प्रजि चापागार्इँले दोलखामा भूकम्पले भत्काएको घर पुार्निर्माण गर्नुपर्ने भन्दै सरकारी कार्यालय, ठूला घरनाका व्यवसायी र उद्योगपतिसँग चन्दा मागेको पीडितहरुले जानकारी दिएका छन् ।
चन्दा मागिएका सरकारी कार्यालयका कार्यालय प्रमुखहरुले खुलेर प्रजिअको विरोध गरेपनि कतिपय कार्यालय प्रमुख र व्यपारीहरुले सुरक्षाका कारण प्रजिअको अवैधानिक कामको विरोध गर्न सकेका छैनन् ।
राजनैतिक दल र अपराधिक समुहरुको चन्दा आतंकले हैरानी भएका सुनसरीका व्यवसायी, उद्योगपति र कार्यालय प्रमुखहरु जिल्लाको सर्वोच्च निकाय जिल्ला प्रशासन कार्यालयका प्रमुख जिल्ला अधिकारीले नै खुलेआम चन्दा मागेपछि थप आतंकित बनेका छन् ।
पाँच महिना अगाडि कैलालीबाटसरुवा भएर सुनसरी आएका चपागार्इँले सुरुवातका दिनदेखि नै कार्यालय प्रमख र व्यवसायीहरुसँग मोटो रकम चन्दा माग्न सुरु गरेको पीडितहरुले बताएका छन् ।
कतिपय सरकारी कार्यालयका प्रमुख र व्यवसायीहरुले दिएको जिन्सी सामाग्री जिल्ला वन कार्यालय र जिल्ला पशु कार्यालयको गाडीमार्फत काठमाडौंको बसुन्धारामा लगेर राखेको जानकारी अन्नपूर्ण अनालाइनलाई प्राप्त भएको छ ।
प्रजिअ चापगार्इँले जबरजस्ती चन्दा मागेपछि पीडित बनेका कार्यालय प्रमुखहरुले अख्तियारको पूर्वाञ्चल क्षेत्रीय कार्यालय र क्षेत्रीय प्रशासन कार्यालय धनकुटामा समेत उजरी दिएको श्रोतले जानकारी दिएको छ ।
प्रजिअ चापागार्इँले जिल्ला विकास समितको कार्यालय सुनसरी, धरान उपमहानगरपालिका, जिल्ला मालपोत कार्यालय, रामधुनी भासी नगरपालिलका, दुहबीभलुवा नगरपालिका, जिल्ला वन कार्यालय, जिल्ला पशुसेवा कार्यालय, जिल्ला नापी कार्यालय र जिल्ला कृषि कार्यालय लगायतका कार्यालय प्रमुखहरुसँग चन्दा मागेको सम्बन्धित कार्यालयका प्रमुखहरुले गुनासो गरेका छन् ।
सुनसरीका स्थानिय विकास अधिकारी रामप्रसाद वाग्लेले प्रजिअ चापागार्इँको चन्दा आतंकले सुनसरीका कार्यालय प्रमुख मात्र नभएर सिंगो सुनसरीवासी त्रसित भएको गुनासो गरेका छन् ।
उनले जिल्लाका सरकारी कार्यालयहरुको सर्बोच्च निकायमा बसेका प्रजिअजस्तो व्यक्तिले आर्थिक सहयोगका नाममा चन्दा उठाउनु गलत भएकाले चापागार्इँविरुद्ध कारबाहीको माग गरेका छन् ।
जिल्ला पशुसेवा कार्यालय सुनसरीका प्रमुख शिवनाथ महतोले कार्यालयको गाडीमा प्रजिअको चार, पाँच कार्टुन सामान काठमाडौंको बसुन्धरास्थित घरमा पुर्याइदिएको स्विकार गरेका छन् ।
प्रजिअ चापागाईँले सुनसरीका यातायात व्यवसायी, इँटा व्यवसायी, हाडवयर व्यवसायी, सुन व्यपारी, निजि अस्पताल संचालक र उद्योगपतिहरुलाई समेत कार्यालय, निवास, इटहरीको चिन्तन चौतारी होटर र धरानको धरान किचनमा बोलाएर दोलखाको पुख्र्याैली घर भूकम्पले भत्काएकाले आफ्नो तलबले नधान्ने भन्दै चन्दा मागेको धरानका एक व्यवसायीले नाम नछाप्ने सत्रमा बताएका छन् ।
प्रजिअको चन्दा आतंकले सुनसरीका जिल्ला प्रहरी कार्यालय, सशस्त्र प्हरी कार्यालय र राष्ट्रिय अनुसन्धान आयोगका प्रमुख समेत असन्तुष्ट रहेको बताइएको छ ।
जिल्लाको शान्ति सुरक्षाको नेतृत्व सम्हालेर बस्ने प्रजिअले नै चन्दा माग्दै हिँड्नु सह्य नभएकाले माथिल्लोे निकायले कारबाही गर्न जिल्लाका एक सुरक्षा अधिकारीले भने ।
उद्योग वाणिज्य संघ सुनसरीका उपाध्यक्ष गिरीधारी सापकोटाले शक्तिको दुरुपयोग गर्दै व्यवसायीहरुसँग कार्यालयमा बोलाएर चन्दा माग गर्ने प्रजिअलाई कारबाही गर्न सरकारसँग माग गरेका छन् ।
उनले व्यवसायीहरुले प्रजिअले कार्यालय र विभिन्न होटलमा बालाएर व्यवसायीसँग चन्दा माग्ने गरेको विषयमा उद्योग वाणिज्य संघमा जानकारी गराएको बताए ।
माओवादी केन्द्रका सुनसरी अध्यक्ष निर्मल बरालले प्रजिअ चापागाईले सुनसरीका सरकारी कार्यालयहरुमा चन्दा मागेर हैरान बनाएको विषयमा स्थानीय निकायका कर्मचारीहरुले समेत पार्टीमा मौखिक उजुरी दिएको बताएका छन् ।
धरान उपमहानगरपालिकाका कार्यकारी अधिकृत टीकादत्त राईले पनि प्रजिअ चापागाईँको व्यवहारले सुनसरीका सरकरी कार्यालयहरुमा शान्तिपूर्वक काम गर्ने बाताबरण नभएको बताए ।
सरकारी कार्यालयका प्रमुख र व्यवसायीहरुसँग चन्दा मागेको विषयमा प्रजिअ चापागार्इँसँग कुरा गर्दा केही बताउन मानेनन् । अन्नपूर्ण अनलाइनको फोन सम्पर्कमा चापागाईँले ‘म फोनमा कुरा गर्दिनँ, तपाईँ मेरो कार्यालयमा आउनुस बसेर गफ गरौँला’ भने ।
पूर्वाञ्चल क्षेत्रीय प्रशासक रामकुमार आचार्यले सुनसरीका प्रजिअले सरकारी कार्यालय र व्यवसायीसँग चन्दा मागेको विषमा छानविन अगाडि बढाई दोषी देखिए कडा कारबाही गरिने बताए ।
उनले प्रजिअ चापागार्इँले चन्दा मागेको विषमा जिल्लाका कार्यालय प्रमुखहरुसँग बुझ्ने काम भैरहेको जानकारी दिए । गृहमन्त्रालयको प्रशासन विभागका प्रमुख सहसचिव चक्र बुढाले सुनसरीका प्रजिअ चापगाईँको चन्दा आतंकबारे गृहसचिवसँग सल्लाह गरी कारबाही थालिने आश्वासन दिए ।
प्रतिक्रिया दिनुहोस !
