बेनी–जोमसोम सडक अबरुद्ध, तीर्थयात्री अलपत्र
बेनीः अबिरल बर्षाका कारण बेनी–जोमसोम सडक अबरुद्ध बनेको छ । ७२ किलोमिटर सडकखण्डको चमरे, राहुपारे, बैसरी, भिरकाट्टे, दाना काभ्रे र बाधरजुँगे भीरमा पहिरो खस्दा मंगलबार रातिदेखि यातायात अवरुद्ध बनेको हो ।
मुक्तिनाथ दर्शन र मुस्ताङ भ्रमणका लागि उपयुक्त सिजन मानिने यो समयमा सडक अवरुद्ध हुँदा स्थल मार्ग हुदै आएका आन्तरिक तथा बाह्य तीर्थयात्री र पर्यटक मारमा परेका छन् ।
यात्रु थुप्रै स्थानमा सवारी साधन परिर्वतन गरेर यात्रा गर्न बाध्य छन् । चमरे र बैसरीमा सडक भासिँदा यात्रुहरु पैदल मार्फत घुमाउरो बाटोबाट यात्रा गर्दै आएका छन् ।
विभिन्न स्थानमा खसेको पहिरोले बेगखोला, तिब्ल्याङ, हिस्तान, शिख, घार, भुरुङतातोपानी, दाना, नारच्याङ लगायत करिब एक दर्जन बस्तीका सर्वसाधारण प्रत्यक्ष समस्यामा परेका छन् ।
ति गाउँहरुमा दैनिक उपभोग्य सामान ढुवानी गर्न समेत समस्या भएको छ । मुक्तिनाथ दर्शन र कागबेनीमा स्नानका लागि भारतीय तीर्थयात्री यतिबेला मुस्ताङमा बढी जाने गरेका छन् ।
बर्षापछिको पहिरोले सडक जीर्ण बनेपछि यात्रा जोखिमपूर्ण बनेको म्याग्दी जीप तथा बस सञ्चालक समितिका सचिब सुमन श्रेष्ठले जानकारी दिए । बर्षाले मुस्ताङ खण्डमा भने खासै प्रभाव पारेको छैन ।
दुई जिल्लाको सीमाना बाँधरजुँगे भीरदेखि म्याग्दीखण्डमा अत्यन्त जोखिम छ । ‘पहिरो नरहेको ठाउँहरुमा पनि हिलोले गाडी जानै सक्ने अवस्था छैन्’, सचिब श्रेष्ठ भने, ‘केहि ठाउँहरुमा हाम्रो गाडीहरु पनि फसेका छन् ।’
पहिरो खसेको स्थानमा यात्रुको सहयोग र उद्धारका लागि प्रहरी परिचालन गरिएको छ । जिल्ला प्रहरी कार्यालय, सीमा प्रहरीचौकी भुरुङतातोपानी र दाना प्रहरीचौकीबाट प्रहरी परिचालन भएका हुन् ।
पर्यटकको चाप बढी हुने यो सडकखण्डका बुधबार बिहानै प्रमुख जिल्ला अधिकारी केशवराज आचार्य र प्रहरी नायव उपरीक्षक विश्वराज खड्काले स्थलगत निरीक्षण गरेका छन् ।
बर्षाले थुप्रै स्थानमा पहिरो झरेको र सडक जीर्ण बनेकाले सडक विभाग बाग्लुङसँग सहकार्य गरेर यातायात सञ्चालनको प्रयास गरिएको प्रजिअ आचार्यले बताए ।
प्रतिक्रिया दिनुहोस !
