जनताको ज्यान जोगाउँदै नेपाली सेना (फोटोफिचर)

काठमाडौँः पछिल्ला दुई दिनमा बाढीले देशभरको जनजीवन अस्तव्यस्त भएको छ । बाढी र पहिरोले दुई दिनमा देशभर ७२ जनाको मृत्यु भएको र दर्जनौ बेपत्ता भएको गृहमन्त्रालयले जनाएको छ । बाढी र पहिरोले मुलुकभरको जनजीवन प्रभावित हुँदा नेपाली सेनाले उद्धारको क्रमलाई युद्धस्तरमा अगाडि बढाएको छ ।

सेनाले उद्धारका लागि तीन हेलिकोप्टर तयारी अवस्थामा राखेको नेपाली सेनाका प्रवक्ता प्रवक्ता सहायकरथी ताराबहादुर कार्कीले अन्नपूर्ण अनलाइनलाई जानकारी दिए ।

कार्कीका अनुसार सेनाले तयारी गरेका तीन हेलिकोप्टर मध्ये एउटा पूर्वक्षेत्रको उद्धारका लागि इटहरीमा राखिएको छ । मध्यपश्चिम र सुदूरपश्चिम क्षेत्रका लागि सुर्खेतमा र मध्येक्षेत्रको उद्धारका लागि अर्को हेलिकोप्टर काठमाडौँमा तयारी अवस्थामा छ ।

सेनाको मुख्यालयले बाढी र पहिरोपीडितको उद्धारका लागि देशभरका सैनिक युनिटलाई समेत जनताको जिऊ, ज्यान र सम्पत्ति जोगाउन सक्रियतापूर्वक सहयोग गर्न निर्देशन दिएको छ ।
 
सेनाले बाढी र पहिरोपीडितको उद्धार, राहत र आपतकालिन अपरेशन गर्दै आएको छ  । ‘हामी पहिला उद्धार गर्छौँ, त्यसपछि राहतको काम हुन्छ र आपतकालिन ‘अपरेशन’लाई अगाडि बढाउछौँ’, कार्कीले भने । 

देशभरका बाढी पहिरो प्रभावित क्षेत्रमा सेनाले स्थानीय युनिटबाट व्यापक रुपमा फौज परिचालन गरेको मुख्यालयले जानकारी दिएको छ ।

अपतकालीन उद्धार गर्न ७५ करोड माग
गृह मन्त्रालयले आपतकालीन उद्धार र राहतका लागि प्रधानमन्त्री राहत कोषबाट ७५ करोड  रुपैयाँ माग गरेको छ । बुधबार बिहान बसेको गृहमन्त्रालय अन्तर्गतको दैवी प्रकोप उद्धार समितिको बैठकले बाढी पहिरोपीडितको उद्धारका लागि उक्त रकम माग गरेको हो ।

गृहमन्त्रालयकोसमेत जिम्मेवारी लिएका रक्षामन्त्री भीम रावलले बाढी तथा पहिरोमा परेका वृद्धावृद्धा, बालबालिका र सुत्केरीलाई प्राथमिकता दिन निर्देशन समेत दिएका छन् ।

सरकारले अत्यावश्यक ठाउँमा हेलिकोप्टर पठाएरसमेत उद्धार गर्न निर्देशन दिएको छ । गृह मन्त्रालयले बाढी पहिरोमा परेकालाई नेपाल प्रहरीको हटलाइन १०० मा खबर गर्नसमेत अपिल गरेको छ ।

कुन जिल्लामा कतिको मृत्यु

गृहमन्त्रालयको पछिल्लो तथ्याङ्क अनुसार सबैभन्दा बढी प्युठानमा ३८ जनाको मृत्यु भएको छ । गुल्मीमा ७, बाग्लुङमा ६, पाल्पामा ४, रोल्पामा ४, मकवानपुरमा ३, अर्घाखाँची र रुपन्देहीमा २–२, झापा, पर्वत, दाङ, उदयपुर, बारा, काठमाडौँ, दोलखामा १–१ जनाको मृत्यु भएको छ । कोसी, बबई, गण्डक नहरमा पानीको बहाव बढ्ने क्रम रोकिए पनि खतरा अझै नटरेको गृहमन्त्रालयले बताएको छ ।  उद्धार र राहतका लागि नेपाली सेना सँगै, प्रहरी र सशस्त्र प्रहरीलाई परिचालन गरिएको छ ।