घर फर्कन सकेनन् विस्थापित

झापाःगत शनिबारदेखि चार दिनसम्म परेको भारी वर्षाले खोलामा आएको बाढीका कारण विस्थापित भएकाहरू अझै पनि घर फर्कन सकेका छैनन् । पानी जमेका कारण विस्थापित बनेका केही पानी घटेपछि घर फर्के पनि खोलाको भंगालो पसेर घर भत्काइदिएका धेरै सर्वसाधारण अझै पनि नजिकका विद्यालयमा आश्रित छन् ।

भद्रपुर १ भैंसाबाडीका एक सय २३ घर परिवारका ६ सय २२ जना अहिले पनि हिमाली उच्च मावि पृथ्वीनगरमा आ श्रय लिएर बसेका छन् । बुधबार अपरान्ह त्यहाँ पुग्दा बालबालिका तथा बूढापाका विद्यालयको कोठामा बेसिरहेका भेटिए भने कोही खाना पकाउने काम व्यस्त थिए । केही अगुवा राहत लिएर आएकासँग गुनासा पोखिरहेका थिए ।

भैंसाबाडीका प्रकाश उप्रेतीले नेपाली सेना, सशस्त्र प्रहरी तथा नेपाल प्रहरीले आफूहरूलाई उद्धार गरेको भन्दै सुरक्षाकर्मीको प्रशंसा गरे । विपद्का बेलामा आफूहरूलाई सुरक्षाकर्मीले गरेको सहयोगले ज्यान बाँचेको उनले बताए । उनले भने, ‘सुरक्षाकर्मीले हामीलाई उद्धार नगरेको भए खोलाले बगाइसक्थ्यो ।’ हिमाली उच्च माविमा रहेका बाढीपीडितलाई भद्रपुर नगरपालिकाले खुवाउने व्यवस्था मिलाएको नगरपालिकाका कार्यकारी अधिकृत सन्तोष घिमिरेले जानकारी दिए ।

 

भारतको बिहारसँग जोडिएको झापाको दक्षिणी गाविस केचनाका बाढीपीडित सर्वसाधारणलाई त्यहीँको महेन्द्ररत्न माध्यमिक विद्यालयमा राखिएको छ । अधिकांश मुस्लिम समुदायका मानिस रहेको उक्त गाविसका बाढीपीडितलाई त्यहीँका संस्था तथा व्यवसायीले खानाको व्यवस्था मिलाएका छन् । बाढीपीडितले समयमा खानपिनको व्यवस्था मिलाइदिएकोमा प्रशासनलाई धन्यवादसमेत दिए । तर केचनामा बाढीपीडित रहेको विद्यालय आसपास फोहोर रहेको भन्दै सरसफाइमा ध्यान दिन खानेपानी कार्यालय भद्रपुरका प्रमुख चोकप्रसाद धितालले आग्रह गरे ।

पाठामारी गाविसका सबै वडा बाढीले डुबेको छ । त्यहाँ एक सय १० परिवारका करिब ६ सयजनालाई खानाको व्यवस्था मिलाइएको छ । बुधबार स्थानीय सुनचाँदी व्यवसायीले पाठामारीका बाढीपीडितलाई खाना खुवाएका थिए । बाढीपीडितलाई बाटोमै लाम लगाएर खाना वितरण गरिराखिएको थियो । झापामा एक हजार पाँच सयजनालाई विभिन्न विद्यालयमा राखिएको छ । उनीहरू कोही पनि भोकै बस्नु नपरेको प्रमुख जिल्ला अधिकारी मदन भुजेलले जानकारी दिए ।