सुनसरीमा दुई सय ८५ घर विस्थापित

इटहरीः लगातारको वर्षाका कारण विभिन्न खोलामा आएको बाढी बस्तीमा पसेपछि घर भत्किएर र डुबानमा परेर सुनसरीका २ सय ८५ घर परिवार विस्थापित भएका छन् । बाढीले जिल्लामा २० घर पूर्ण रूपमा भत्काएको छ । बाढीका कारण सुनसरीमा एक हजार ४ सय ६१ जना सर्वसाधारणको बिचल्ली भएको छ ।

बाढीले सुनसरीमा सबैभन्दा बढी घर अमडुवा गाविसमा भत्काएको छ । अमडुवा गाविसका विभिन्न वडाका एक सय १३ घरमा क्षति पुर्‍याएको छ । बाढीले तनमुना गाविसमा ५७ घर, छिटाहा गाविसमा ४६ घर, अमाहिबेला गाविसमा १७ घर, दुहबीभलुवा नगरपालिकामा १७ घर, धरान उपमहानगरपालिकामा १५ घर, रामनगर भुटाहा गाविसमा ९ घर, राजगन्जसिनुवारी गाविसमा पाँच घर, चिमडी गाविसमा तीन घर, इटहरी उपमहानगरपालिकामा दुई र वसन्तपुर गाविसमा एक घर भत्काएको सुनसरीका प्रमुख जिल्ला अधिकारी मोहनबहादुर चापागार्इंले बताएका छन् ।

बाढीले बगाएर सुनसरीमा दुईजनाको मृत्यु भएको छ भने जिल्लाका विभिन्न गाविसमा एक हजारभन्दा बढी घर डुबानमा परेका छन् । घर डुबानमा परी विस्थापित भएकाहरूलाई स्थानीय प्रशासनले तत्काल त्रिपाल उपलब्ध गराएर विभिन्न विद्यालय, स्वास्थ्य चौकी र सामुदायिक भवनमा अस्थायी बसोवासको व्यवस्था मिलाइएको प्रजिअ चापागाईंले बताएका छन् ।

सुनसरीका सिमरिया, तनमुना, छिटाहा, साहेबगन्ज, हरिनगरा , कप्तागन्ज, देवानगन्ज, राजगन्जसिनुवारी, लौकही, हरिपुर, श्रीपुर, प्रकाशपुर, भोक्राहा, मधुवनलगायतका गाविसका करिब एक हजारभन्दा बढी घर डुबानमा परेको सुनसुरीका प्रहरी प्रमुख एसपी पोषराज पोखरेलले बताए । उनले बाढीबाट धनजनको क्षति हुन नदिन सशस्त्र प्रहरीसँग समन्वय गरेर उद्धार कार्य जारी राखेको जानकारी दिए । राजगन्ज सिनुवारीका महेश्वर यादवले बाढीका कारण विस्तापित भएकालाई स्थानीय प्रशासनले राहत सामग्री नदिएको गुनासो गरेका छन् ।

बाढीका कारण घर भत्किएर र डुबानमा परेर विस्थापित भएकाहरू स्थानीय विद्यालयको शरणमा छन् । सुनसरीमा बूढीखोला, मरियाखोला, धनउष्णा खोला, गाड्नाखोला र सुनसरी खोलाको बाढी दक्षिणि क्षेत्रका गाविसका बस्तीमा पसेपछि बस्ती डुबानमा परेको सशस्त्र प्रहरी बल सीमा सुरक्षा कार्यालय सुनसरीका प्रमुख सशस्त्र प्रहरी उपरीक्षक जयबहादुर खड्काले बताए ।