बेनी–जोमसोम सडकमा ठाउँठाउँमा पहिरो

बेनीः अविरल वर्षाका कारण बेनी-जोमसोम सडकखण्डको आधा दर्जन स्थानमा पहिरो खस्दा यातायात अवरुद्ध बनेको छ । ७२ किलोमिटर सडकखण्डको चमरे, राहुपारे, बैसरी, भीरकाट्टे, दाना काभ्रे र बाधरजुँगे भीरमा पहिरो खस्दा मंगलबार रातिदेखि यातायात अवरुद्ध बनेको हो । मुक्तिनाथ दर्शन र मुस्ताङ भ्रमणका लागि उपयुक्त मौसम मानिने यो समयमा सडक अवरुद्ध हुँदा स्थलमार्ग हुँदै आएका तीर्थयात्री र पर्यटक मारमा परेका छन् ।

उनीहरू थुप्रै स्थानमा सवारीसाधन परिर्वतन गरेर यात्रा गर्न बाध्य छन् । चमरे र बैसरीमा सडक भासिँदा यात्रु पैदलमार्फत घुमाउरो बाटो हुँदै यात्रा गर्दै आएका छन् । विभिन्न स्थानमा खसेको पहिरोले बेगखोला, तिब्ल्याङ, हिस्तान, सिख, घार, भुरुङतातोपानी, दाना, नारच्याङलगायत करिब एक दर्जन बस्तीका सर्वसाधारण समस्यामा छन् । ती गाउँहरूमा दैनिक उपभोग्य सामान ढुवानी गर्नसमेत समस्या भएको छ । मुक्तिनाथ दर्शन र कागबेनीमा स्नानका लागि भारतीय तीर्थयात्री यतिबेला मुस्ताङ जाने गरेका छन् ।

वर्षापछिको पहिरोले सडक जीर्ण बनेपछि यात्रा जोखिमपूर्ण बनेको म्याग्दी जिप तथा बस सञ्चालक समितिका सचिव सुमन श्रेष्ठले जानकारी दिए । वर्षाले मुस्ताङ खण्डमा भने खासै प्रभाव पारेको छैन । दुई जिल्लाको सिमाना बाँधरजुँगे भीरदेखि म्याग्दीखण्ड अत्यन्त जोखिममा छ । ‘पहिरो नगएको ठाउँमा पनि हिलोले गाडी जान सक्ने अवस्था छैन', सचिव श्रेष्ठले भने, ‘केही ठाउँमा हाम्रा गाडी पनि फसेका छन् ।'

 

पहिरो खसेको स्थानमा यात्रुको सहयोग र उद्धारका लागि प्रहरी परिचालन गरिएको छ । जिल्ला प्रहरी कार्यालय, सीमा प्रहरीचौकी भुरुङतातोपानी र दाना प्रहरीचौकीबाट प्रहरी परिचालन भएका छन् ।पर्यटकको चाप बढी हुने यो सडकखण्डमा बुधबार बिहानै प्रमुख जिल्ला अधिकारी केशवराज आचार्य र प्रहरी नायब उपरीक्षक विश्वराज खड्काले स्थलगत निरीक्षण गरेका छन् । वर्षाले थुप्रै स्थानमा पहिरो झरेको र सडक जीर्ण बनेकाले सडक विभाग बागलुङसँग सहकार्य गरेर यातायात सञ्चालनको प्रयास गरिएको प्रजिअ आचार्यले बताए ।

‘तीनवटै सुरक्षा निकाय तयारी अवस्था छन्, अहिले नेपाल प्रहरीका जवान पहिरो प्रभावित क्षेत्रमा खटिरहेका छन्', उनले भने, ‘राष्ट्रिय महत्त्वको यो सडकलाई सीधा र नियमित सञ्चालन ल्याउने गरी काम गरिरहेका छौँ ।' सडक विभागले गलेश्वर र दाना क्षेत्रमा डोजर प्रयोग गरेर पहिरो हटाउने काम गरिरहेको प्रशासनले जनाएको छ ।