चारदिनदेखि बेनीमा खानेपानीको हाहाकार

बेनीः पहिरोले पाइप फुटेपछि म्याग्दी सदरमुकाम बेनीमा खानेपानीको हाहाकार मच्चिएको छ ।

बेनी खानेपानी तथा सरसफाई उभपोक्ता संस्थाले राम्चे गाविसस्थित पुम्दीखोला र भकिम्ली गाविसको दुधेखोलाबाट पानी ल्याएर सदरमुकाम बेनी सहित गलेश्वर, बगरफाँट र मंगलाघाट क्षेत्रका साढे ९ सय घरमा खानेपानी आपूर्ति गर्दै आएको छ। तर,  लगातार बर्षाका कारण झरेको पहिरोले विभिन्न स्थानमा पाईप फुटेपछि चार दिनदेखि यस क्षेत्रमा खानेपानी वितरण ठप्प बनेको हो ।

धारामा पानी नआउँदा बजारबासी आकाशे पानीको भरमा जीविका चलाउँदै आएका छन् । नियमित उपभोगदेखि सरसफाइमा समेत स्थानीय समस्या झेल्न बाध्य छन् ।

पुम्दीखोलाको मुहानदेखि केहि तल चार ठाउँमा पाइप भाँचिएको छ भने चमेरे र राहुपारेमा पाइप बगाइदिएको छ । बेनीदेखि गलेश्वरको बीचमा दुई स्थानमा पाइप फुटेको छ । दुधेखोलामा भकिम्ली–९ तोराखेतबाट झरेको पहिरोले पाइपमा क्षति पुर्याएको संस्थाले जनाएको छ ।

बेनी खानेपानी उपभोक्ता सरसफाई संस्थाका अध्यक्ष सुवासकुमार श्रेष्ठले पहिरोले दर्जन बढी स्थानमा पाइपमा क्षति पुर्याएपछि पानी आपूर्ति बन्द भएको बताए ।

सबै ठाउँमा लेदो सहितको पहिरो जाँदा मर्मतमा समस्या देखिएको उनले बताए । दुबै मुहानबाट ल्याइएको पानी बेनीबजार भन्दा माथि बराहपाखो समुदायिक वनमा निर्माण गरिएको ट्याङकीमा जम्मा हुन्छ । प्रतिसेकेण्ड १३ लिटर पानी जम्मा हुने ट्याङकीबाट घर–घरमा पानी वितरण गरिएको छ ।

पुम्दीखोलाबाट तत्काल पानी ल्याउन संभव नभएपछि बुधबारदेखि दुधेखोलाको पानी पहिरोमा वैकल्पिक व्यवस्था मिलाएर ल्याउने प्रयास भइरहे पनि सफल हुन सकिरहेको छैन । प्राविधिक सहितको टोली दुबै स्थानमा खटेपनि सफल नभएको संस्थाका प्रबन्धक चन्द्रबहादुर थापाले बताए ।