उत्कृष्ट धार्मिक पर्यटकीय गन्तव्य पर्रोहा बोलबमधाम

बुटवलः अढाई दशकको छोटो अवधीमा रुपन्देहीको सैनामैना नगरपालिकास्थित पर्रोहा बोलबमधाम मुलुककै एक अग्रणी धार्मिक पर्यटकीय गन्तव्य बनेको छ ।
बोलबम श्रावणी जलार्पण मेलाले यसलाई पश्चिम नेपालको उत्कृष्ट धार्मिक पर्यटकीय गन्तव्य बनाएको हो ।

यही मेलाकै कारण पिछडिएको पर्रोहा गाउँ नगरमा स्तरोन्नती भएको छ । यसले सनातन धर्म संस्कृतिको संरक्षणमा पनि टेवा पुगेकोे छ ।
युवालाई धर्मप्रति आकर्षित गरी सदाचारी बन्न उत्प्रेरित गराउनुका साथै आर्थिक विकासमा टेवा पुगेको छ ।

अन्य पर्यटकीय मौसममा पनि बुद्ध जन्मस्थल लुम्विनी भ्रमणमा आएका विदेशी पर्यटक यहाँ आउने गर्दछन् । यसलाई लुम्बिनी पर्यटन चक्रमा समावेश गर्ने तयारी रहेको छ ।

शुक्रबार थाईल्याण्डबाट आएका थाई नेपाली संघका उपाध्यक्ष कुमार कार्कीले बोलबम धामको महिमाबाट प्रभावित भएको बताए । उनले थाईल्याण्डमा यसको प्रचारप्रसार गर्ने प्रतिवद्धता पनि जनाए ।

मंगलबार नवलपरासीको त्रिवेणीधामबाट गंगाजल उठाई ८७ किलोमिटर राजमार्गमा नाङ्गो खुट्टाले पैदल यात्रा पूरा गरी आएका पाँचसय जना वोलवम यात्रीले शुक्रवार धामस्थित ज्योतिर्लिङ्गमा जलार्पण गरेका छन् ।

यसबाट मनोकामना सिद्ध हुने जनविश्वास छ । काँवरमा गंगाजल बोकेर बोलवम वोलवम भन्दै राजमार्गमा कोही नाङ्गो खुट्टा पैदल त कोही सवारी साधनमा हिडेका पहेंलो वस्त्रधारी तिर्थालुले साउनमा यस क्षेत्रको सडकलाई रमाईलो बनाएका छन् ।

यो वर्षभरिनै वोलवम मेला तथा जलार्पणको रजत महामहोत्सव कार्यक्रम आयोजना गरिएको छ । यसमा करिव १५ लाख भक्तजन सहभागी हुने अपेक्षा लिइएको प्रचार समितिका सहसंयोजक प्रदिप विकले बताए । गतवर्षको मेलामा १० लाख सहभागी भएका थिए ।

रजत महोत्सवमा धामको हुलाक टिकट र सिक्का प्रकाशन, वृक्षारोपण, रक्तदान, स्वास्थ्य शिविर कार्यक्रम पनि गरिनेछ । हुलाक टिकट सूचना तथा सञ्चार मन्त्रालयले स्विकृत गरी प्रकाशनको क्रममा छ । सिक्काको लागी अर्थमन्त्रालय र राष्ट्र बैंकमा निवेदन पेश गरिएको धाम समितिले जनाएको छ ।
मेलामा चितवनदेखि दाङसम्मको तराई ईलाका र पाल्पा, गुल्मी, अर्घाखाँची पहाडी क्षेत्रका धेरैजसो भक्तजन सहभागी हुन्छन् । भारतको उत्तर प्रदेश र विहारबाट पनि भक्तजन आउँछन् । फुटकर रुपमा मुलुकको धेरैजसो भागबाट भक्तजन आउँछन् । २०४९ सालदेखि यो मेला शुरु भएको हो ।

यसै मेलाबाट प्रभावित भएर पशु्पतिनाथ लगायत मुलुकका अन्य शिवालयहरुमा वोलवम मेलाको पुनर्जागरण भएको धामका संरक्षक व्यासाचार्य किशोरकुमार गौतमले बताए ।

‘मुलुकमा वोलवम श्रावणी जलार्पण मेलाको पुनर्जागरण पर्रोहा वोलवम धामले ल्याएको हो, त्यसअघि भक्तजन यस्तो मेला भर्न भारतको वैजनाथ धाम जान्थे' आचार्य गौतमले भने ।

पर्रोहा बुद्धकालका पाँच ठूला शहरमध्ये एक मानिन्छ । यो धामको ज्योर्लिङ्ग पनि प्राचिन मानिएको छ । कालक्रममा शहर नष्ट भएकाले जंगलविचमा रहेको ज्योतिर्लिङ्गलाई रमेश गिरी नागाबाबाले २०३५ सालमा प्रकाशमा ल्याएका थिए । त्यसपछि मन्दिर बनाई संरक्षण र प्रवद्र्धन गरियो ।
मन्दिरको प्रवद्र्धनसंगै पूर्वाधार विकास र बसाई सराई तिव्र भयो ।

हेर्दाहेर्दै डेढदशकमै पिछडिएको गाउँ नगरपालिका बनेको देख्दा आफूलाई अचम्म लागेको धाम समितिका अध्यक्ष एवं पर्रोहा गाविसका पूर्व अध्यक्ष रामवली चौधरीले बताए ।