विशेष अदालतले ल्हारक्यालसँग माग्यो एक करोड धरौटी
काठमाडौं: विशेष अदालतले माओवादी केन्द्रका निलम्बित सांसद ल्हारक्याल लामासँग बुधबार एक करोड धरौटी माग गरेको छ । गैरकानुनी रुपमा अकुत सम्पत्ति आर्जन गरेको अभियोगमा अख्तियार दुरुपयोग अनुसन्धान आयोगले दायर गरेको मुद्दामा विशेषले लामासँग एक करोड रकम धरौटी माग गरेको हो ।
विशेष अदालतका अध्यक्ष मोहनरमण भट्टराई, सदस्य न्यायाधीश भूपेन्द्रप्रसाद राई र प्रभा बस्नेतको इजालशले लामासँग उक्त रकम धरौटी माग गरेको हो ।
लामाले पटकपटक सार्वजनिक पद धारण गर्दै ९ करोड २४ लाख रुपैयाँ बराबर अकुत सम्पत्ति आर्जन गरेको दाबीसहित अख्तियार दुरुपयोग अनुसन्धान आयोगले गत वैशाख ३० गते मुद्दा दायर गरेको थियो । लामा पूर्वअर्थ राज्यमन्त्री, गुम्बा व्यवस्थापन समिति अध्यक्ष तथा माओवादी केन्द्रका सांसदसमेत रहेका थिए ।
अख्तियार छानबिनबाट लामाको कुल २९ करोड ७९ लाख १४ हजार रुपैयाँ बराबर सम्पत्ति रहे भए पनि नौ करोड २४ लाख रुपैयाँ गैरकानुनी रहेको निक्र्योल गरिएको थियो । विशेषका रजिष्ट्रार भद्रकाली पोखरेलका अनुसार लामा धरौटी बापत सिद्धार्थ बैंकलाई जमानत राखेर तारिखमा बसेका छन् ।
प्रतिक्रिया दिनुहोस !
