ब्राजिल र जर्मनी फाइनलमा
रियो दी जेनेरियोः घरेलु टोली ब्राजिल रियो ओलम्पिकअन्तर्गत पुरुष फुटबलको फाइनलमा पुगेको छ । ब्राजिलले बुधबार राति भएको सेमिफाइनलमा होन्डुरसलाई ६-० गोलको फराकिलोअन्तरले हरायो । विश्व च्याम्पियन जर्मनी पनि फाइनल पुग्यो । जर्मनीले अर्को सेमिफाइनलमा नाइजेरियालाई २-० गोलले पराजित गर्यो । जर्मनी महिला स्पर्धाको पनि फाइनलमा पुगेको छ ।
ओलम्पिक खेलकुदको पुरुष फुटबलमा पहिलो पटक स्वर्ण जित्ने प्रयासमा रहेको पाँच पटकको विश्व च्याम्पियन ब्राजिलले होन्डुरसविरुद्धको खेलमा उत्कृष्ट प्रदर्शन गर्यो । ब्राजिल यसअघि तीनपटक ओलम्पिक पुरुष फुटबलको फाइनल पुगे पनि रजत पदकमै सीमित भएको थियो । ब्राजिललगातार दोस्रो पटक ओलम्पिक पुरुष फुटबलको फाइनलमा पुगेको हो ।
घरेलु टोलीका लागि नेमार र गाब्रियल जिससले दुईदुई गोल गरे । लुवान र माक्र्विनहोसले पनि एकएक गोल गरे । चर्चित युवा स्टार नेमारले दुई गोलका लागि एसिस्ट पनि गरेका थिए । नेमारले खेल सुरु भएको १४ सेकेन्डमै पहिलो गोल गरेका थिए । उनी ओलम्पिक फुटबलको इतिहासमा सबैभन्दा छिटो गोल गर्ने खेलाडी पनि बने । त्यसपछि लगातार दुई गोल गर्दै गाब्रियलले टोलीको सम्भावना बलियो बनाए ।
ब्राजिलमा नयाँ नेमारका रूपमा हेरिएका १९ वर्षीय गाब्रियलले २६ औं मिनेटमा टोलीको अग्रता दोब्बर बनाएका थिए । उनले लुवानको पासमा गोल गरेका हुन् । गाब्रियलले नेमारको पासमा गोल गर्दै ३५ औं मिनेटमा टोलीलाई ३-० को बलियो स्थितिमा पुर्याए । ब्राजिलले मध्यान्तरपछि तीन गोल गर्यो । ५१ औं मिनेटमा माक्र्विनहोसले नेमारको पासमा गोल गरे ।
यसपछि लुवानले ७९ औं मिनेटमा गोल थपे । इन्जुरी समयमा नेमारले पेनाल्टीमार्फत गोल गरेका थिए । समूगहत चरणको खेलमा गोल गर्न नसकेका स्पेनिस ला लिगा क्लब बार्सिलोना स्टार खेलाडी नेमारले क्वार्टरफाइनलमा व्यक्तिगत पहिलो गोल गरेका थिए । बार्सिलोनाले कोपा अमेरिका र ओलम्पिकमध्ये एउटा प्रतियोगितामा मात्र नेमारलाई सहभागी गराउन ब्राजिललाई पत्र लेखेपछि उनलाई ओलम्पिक खेलकुदमा मात्र समावेश गरिएको थियो ।
दुई वर्षअघि घरेलु मैदानमै आयोजित विश्वकपको सेमिफाइनलमा जर्मनीसँग ७-१ गोलले पराजित भएपछि ब्राजिलको निकै आलोचना भएको थियो । नेमार चोटका कारण उक्त खेलमा सहभागी हुन पाएका थिएनन् । तर यस पटक जर्मनीसँगको उक्त हारको बदला फाइनलमा लिने अवसर ब्राजिलले सिर्जना गरेको छ । ब्राजिलले नेमारबाट ठूलो अपेक्षा गरे पनि उनले हालसम्म सिनियर राष्ट्रिय टोलीबाट उपाधि सफलता हात पार्न सकेका छैनन् ।
चार वर्षअघि लन्डनमा आयोजित ओलम्पिक खेलकुदमा राम्रो प्रदर्शन गरेका नेमार फाइनलमा भने सफल देखिएनन् । यसपटक महिलातर्फ पनि ब्राजिल सेमिफाइनलमा पुगेको थियो । तर, सेमिफाइनलमा स्विडेनसँग टाइब्रेकरमा पराजित भयो । ब्राजिलले ओलम्पिक खेलकुदको इतिहासमा महिला फुटबलतर्फ पनि हालसम्म स्वर्ण पदक जित्न सकेको छैन ।
नाइजेरियाविरुद्धको खेलमा भने जर्मनीका लुकास क्लोस्टरम्यान र निल्स पिटर्सनले एकएक गोल गरे । क्लोस्टरम्यानले नवौं मिनेटमा विश्व विजेतालाई अग्रता दिलाएका थिए, म्याक्स मेयरको पासमा गोल गर्दै । नाइजेरियाले अन्तिम समयसम्म खेलमा फर्कने प्रयास गरे पनि सफल हुन सकेन । पिटर्सनले ८९ औं मिनेटमा गोल गर्दै अग्रता दोब्बर बनाएर जर्मनीलाई जित नजिक पुर्याएका थिए ।
सन् १९९२ पछि पहिलो पटक ओलम्पिक पुरुष फुटबल खेलिरहेको जर्मनीले यसअघि यो प्रतियोगितामा दुई कांस्य पदक जितेको थियो । जर्मनीले सिनियर अन्तर्राष्ट्रिय फुटबलमा लगातार उत्कृष्ट प्रदर्शन गर्दै आए पनि उमेरस्तरको फुटबलमा भने खरो उत्रन सकेको थिएन ।
जर्मनीले सिनियर अन्तर्राष्ट्रिय फुटबलमा पुरुषतर्फ चारपटक विश्वकप र तीनपटक युरोकप जितेको छ । महिलातर्फको फाइनलमा भने जर्मनीले स्विडेनसँग प्रतिस्पर्धा गर्नेछ । ओलम्पिक महिला फुटबलमा जर्मनीले यसअघि तीन पटक कांस्य पदक जितेको छ ।
प्रतिक्रिया दिनुहोस !
