एक सय २५ डीएसपी सरुवा

काठमाडौंः प्रहरी प्रधान कार्यालयले एक सय २५ प्रहरी नायब उपरीक्षक (डीएसपी) को सरुवा गरेको छ । सरुवा गरिएका सबै डीएसपीले भदौको तलब खान सरुवा भएकै स्थानमा पुग्नुपर्नेछ ।

सरुवामा उपत्यकाका नौ वृत्तका डीएसपीसमेत परेका छन् । महानगरीय प्रहरी वृत्त थानकोटका डीएसपी दिल्लीराज पन्त अञ्चल प्रहरी कार्यालय गण्डकी पुगेका छन् । उनको स्थानमा कृष्णप्रसाद पंगेनी आएका छन् ।

सातदोबाटो वृत्तकी तारादेवी थापा प्रहरी प्रधान कार्यालयको अपराध अनुसन्धान विद्यालयमा पुगेकी छिन् भने सातदोबाटोमा रामेश्वरप्रसाद यादव आएका छन् । सिंहदरबार वृत्तमा मनोहरप्रसाद भट्टलाई ल्याइएको छ । जनसेवा वृत्तका विनोद घिमिरे अञ्चल प्रहरी कार्यालय बागमती पुगेका छन् ।

जनसेवामा सन्तोष आचार्यलाई ल्याइएको छ । महाराजगन्ज वृत्तका विश्वमणि पोख्रेल अख्तियार दुरुपयोग अनुसन्धान आयोगमा सरुवा भएका छन् । प्रहरी मुख्यालयले उनको ठाउँमा गोविन्द पुरीलाई ल्याएको छ । मुख्यालयले कमलपाखेरी वृत्तका डीएसपी लोकेन्द्र श्रेष्ठलाई मध्यक्षेत्रीय प्रहरी कार्यालयमा सरुवा गरेर उनको ठाउँमा महेश थापालाई ल्याएको छ ।

कालीमाटी वृत्तका हेमकुमार थापा पनि अख्तियारमै सरुवा भएका छन् । उनको ठाउँमा नवराज अधिकारी सरुवा भएका छन् । ठिमी वृत्तका डीएसपी प्रवीणलाल श्रेष्ठ जिल्ला प्रहरी कार्यालय धनकुटा पुगेका छन् भने वृत्तमा श्यामबाबु ओलियालाई ल्याइएको छ । त्यसैगरी बालाजु वृत्तका सञ्जीवदास शर्मा क्षेत्रीय ट्राफिक प्रहरी कार्यालय इटहरीमा सरुवा भएका छन् । बालाजुमा डीएसपी सन्तोष तामाङलाई सरुवा गरिएको छ ।

प्रहरी मुख्यालयले प्रधानमन्त्री विशेष सुरक्षा एकाइमा जिल्ला प्रहरी जाजरकोटका डीएसपी दानबहादुर मल्ललाई ल्याएको छ । मल्ल यसअघि प्रधानमन्त्री पुष्पकमल दाहालका विशेष सुरक्षामा खटिँदै आएका थिए ।

अपराध अनुसन्धान विभागको वैदेशिक रोजगार महाशाखा हेर्दे आएका डीएसपी कुमुद ढुंगेल जिल्ला प्रहरी कार्यालय रामेछाप सरुवा भएका छन् । जिल्ला प्रहरी कार्यालय हुम्ला, रसुवा, कालीकोट, पाँचथर, मनाङ, डोटी, ओखलढुंगा, डोल्पा, खोटाङ, डडेल्धुरा, जुम्ला, दोलखा, इलाम, बाजुरा, बझाङ, दार्चुला र मुगुमा इन्चार्जको जिम्मेवारी समालेका डीएसपी पनि सरुवा भएका छन् ।