सरकारलाई सघाउने जिम्मा पाए श्रेष्ठले

काठमाडौं: माओवादी केन्द्रका नेता नारायणकाजी श्रेष्ठले पार्टीका तर्फबाट सरकारलाई सघाउने जिम्मेवारी पाएका छन । माओवादी केन्द्रीय कार्यालयको शनिबार बसेको बैठकले श्रेष्ठ नेतृत्वमा ११ सदस्यीय सरकार सञ्चालन सहयोग समिति गठन गरेको हो । समितिमा संगठन विभागका प्रमुख रामबहादुर थापा बादल, उपप्रधानमन्त्री कृष्णबहादुर महरा, नेताहरू मात्रिका यादव, वर्षमान पुन, गिरिराजमणि पोखरेल, देव गुरुङ, टोपबहादुर रायमाझी, हरिबोल गजुरेल, पम्फा भुसाल र तिलक परियार छन् ।

बैठकले थापाको नेतृत्वमा संगठन विभागलाई पूर्णता दिएको छ । थापा नेतृत्वको समितिमा एक नम्बर प्रदेशबाट गोपाल किराँती, दुई नम्बरबाट मात्रिका यादव, पाँच नम्बरबाट वर्षमान पुन, ६ नम्बरबाट शक्तिबहादुर बस्नेत, सात नम्बरबाट लेखराज भट्ट छन् । उनीहरू ती प्रदेशका इन्चार्ज हुन् । तीन नम्बर प्रदेशको इन्चार्जमा थापा आफैं हुन् ।

समितिमा टोपबहादुर रायमाझी, गिरिराजमणि पोखरेल, जयपुरी घर्ती, मणि थापा र अन्तर्राष्ट्रिय विभागका प्रतिनिधि राख्ने निर्णय गरिएको पार्टीले जनाएको छ ।

एक नम्बर प्रदेशका इन्चार्ज राम कार्की मन्त्री भएपछि उनको स्थानमा किराँतीलाई ल्याइएको छ भने ६ नम्बर प्रदेशका इन्चार्ज जनार्दन शर्मा मन्त्री भएपछि उनको स्थानमा पूर्वमन्त्री शक्तिबहादुर बस्नेतलाई ल्याइएको छ । नेता हरिबोल गजुरेलका अनुसार थापालाई संगठन विभागको इन्चार्जका रूपमा कार्यकारी अधिकार दिइएको छ भने श्रेष्ठले सरकारसँग सहकार्य गरेर सरकारलाई सहयोग गर्ने जिम्मा दिइएको छ । 'सबै नेताहरूले जिम्मेवारी पाएका छन्', गजुरेलले अन्नपूर्णसँग भने ।