ला लिगा फुटबलमा रियल मड्रिडद्वारा सेल्टा भिगो पराजित
काठमाडौंः स्पेनिस जाइन्ट रियल मड्रिडले लगातार दोस्रो जित हात परेको छ। गएराति घरेलु मैदान सान्टियागो बर्नबाउमा भएको खेलमा रियल मड्रिडले सेल्टा भिगोलाई २–१ गोल अन्तरले पराजित गर्यो।
पहिलो हाफ गोलरहित बराबरी खेलेको रियल मड्रिडले खेलको ६० औं मिनेटमा अल्भेरो मोरोटाको गोलबाट अग्रता लियो। तर, त्यो अग्रता रियल मड्रिडले धेरैबेर टिकाउन सकेन। खेलको ६७ औं मिनेटमा सेल्टा भिगोका लागि फावियन एरेलले बराबरी गोल फर्काए।
१–१ गोलको बराबरीको स्थितिमा मिडफिल्डर टोनी क्रुसले खेलको ८१ औं मिनेटमा गोल गर्दै टोलीलाई २–१ को अग्रता दिलाए। बाँकी समयमा दुवै टोलीबाट कुनै गोल हुन नसकेपछि रियल मड्रिड २–१ गोल अन्तरले विजयी भयो। जितपछि रियल मड्रिडले ला लिगामा लगातार दोस्रो जित हात पार्यो।
यसैबीच गएराति नै भएको ला लिगाको अर्को खेलमा एथ्लेटिको मड्रिड नयाँ क्लब लिगेन्ससँग गोलरहित बराबरीमा रोकिएको छ। एथ्लेटिको मड्रिड लगातार दुई खेलमा बराबरीमा रोकिन बाध्य भएको छ।
रियल मड्रिडको दुई खेलबाट ६ अंक भएको छ भने सेल्टा भिगोले भने अंक तालिकामा खाता नै खोल्न सकेको छैन। एथ्लेटिको मड्रिडको दुई खेलबाट २ अंकमात्रै छ।
प्रतिक्रिया दिनुहोस !
