ठोरी क्षेत्रको सदरमुकामसँग सडक सम्पर्कविच्छेद

वीरगन्ज: पर्साको सुदूरपश्चिममा रहेका ठोरी र निर्मलबस्ती गाविसको सदरमुकाम वीरगन्जसँग एक सातादेखि सडक सम्पर्क टुटेको छ ।वीरगन्ज ठोरी सडकखण्डअन्तर्गत पर्ने निर्मलबस्तीमा वर्षाको पानीले सडक हिलाम्मे र जीर्ण भएपछि एक सातादेखि सवारी आवागमन अवरुद्ध हुँदा सदरमुकामसँग ती दुवै गाविसको सडक सम्पर्क टुटेको हो ।

लगातार परेको पानीले वीरगन्ज–ठोरी सडकखण्डअन्तर्गत निर्मलबस्ती गाविसको २२ किलोमिटर कच्ची सडकका विभिन्न स्थानमा ठूलाठूला खाल्डाखुल्डी हुनुका साथै सडक हिलाम्मे भएपछि एक सातादेखि बस सञ्चालनमा नआएको बस व्यवसायी मुन्ना ओझाले बताए ।

यस्तै ठोरी गाविसमा पर्ने बाँडागाउँ, भन्ज्याङ, जानकीनगर र सरस्वतीनगरमा पनि वर्षाको पानीले सडक हिलाम्मे बनाएको छ ।सडक हिलाम्मे भएर बिग्रिएपछि असोज २ गतेदेखि वीरगन्जबाट ठोरीका लागि छुट्ने बस सुवर्णपुरसम्म मात्र पुग्ने गरेका छन् ।

जिल्ला सदरमुकाम जोड्ने कच्ची सडकमा बस नचलेपछि ठोरी र निर्मलबस्ती गाविसका बासिन्दा सदरमुकाम वीरगन्ज पुगेर सरकारी कामकाज गर्न वञ्चित भएका छन् । सरकारी काम लिएर सदरमुकाम पुग्न नसक्दा ग्रामीण भेगका सेवाग्राही नराम्ररी प्रभावित बनेको निर्मलबस्तीका शम्भु खड्काले बताए ।

'दसैंतिहारजस्ता ठूला चाड आइरहेका छन् तर गाडी नचल्दा चाडपर्व मान्न घर फर्कनेहरूलाई सबैभन्दा बढी सास्ती भएको छ', उनले भने ।

सडक मर्मत गर्न सम्बन्धित निकायको पटकपटक ध्यानाकर्षण गराउँदा पनि कुनै सुनवाइ नभएको भन्दै बस व्यवसायी ओझाले सडक मर्मत नभएसम्म बस चल्ने अवस्था नै नरहेको बताए ।

ठोरी र निर्मलबस्ती गाविसलाई लक्षित गरी वीरगन्जबाट दैनिक चारवटा बस छुट्ने गरेका छन् । कच्ची सडक बिग्रेका कारण सुवर्णपुरबाट निर्मलबस्ती, ठोरी हुँदै काठमाडौं जाने रात्रीबससमेत अहिले निर्मलबस्तीको ब्रह्मनगरको ढुंगेबगरसम्म मात्र पुग्ने गरेका छन् ।

जीर्ण सडकका कारण एक सातादेखि बस चल्न छाडेपछि मर्मतका लागि निर्मलबस्ती गाविस कार्यालय अगाडि सरेको छ ।
गाविसको आगामी बजेटबाट मिलाउने गरी नौ लाख रुपैयाँ सडक मर्मतका लागि छुट्ट्याइएको जानकारी निर्मलबस्ती गाविसका निवर्तमान अध्यक्ष लालबहादुर श्रेष्ठले दिए ।

श्रेष्ठले भने, 'जिल्ला विकास समितिले पनि सडक मर्मतका लागि चारवटा ट्रिपर र एक्साभेटर उपलब्ध गराइदिने आश्वासन दिएको छ । मंगलबार साँझसम्म बाटो मर्मतका लागि एक्साभेटर निर्मलबस्तीमा आइपुग्छ होला ।'

ठोरीको ठुटे खोलादेखि ओरियाखोला छेउसम्मको सडक मर्मत गरिने उनले बताए ।