घर ज्वाइँले गरे सासुको हत्या
नेपालगन्जः बाँकेको नौवस्ता–७ तल्लो गाभरकी ६४ बर्षीया देविसरा विकको गएराति हत्या भएको छ । विकका छोरी ज्वाइँ हस्तबहादुर विकले सासु देविसराको हत्या गरेको प्रहरीले जनाएको छ ।
मृतकको लास आफ्नै घुम्ती पसलमा भेटिएको छ । भूतपूर्व सेनाकी श्रीमती देविसरा छोरी ज्वाइँ हस्तबहादुर र नाति मनोज विकको साथमा बस्दै आएकी थिइन् । छोरी सुष्मा विक वैदेशिक रोजगारीको लागि साउदी अरब पुगेकी छिन् ।
सासुको हत्या गरी हस्तबहादुर र नाती मनोज फरार रहेको इलाका प्रहरी कार्यालय कोहलपुरका प्रहरी नायब उपरीक्षक सुरेशप्रसाद काफ्लले जानकारी दिए। पैसाको लागि ज्वाइँले देविसराको हत्या गरेको प्रारम्भिक अनुसन्धानबाट देखिएको डिएसपी काफ्लले जानकारी दिए । उनले भने, ‘ज्वाइँले देविसराको कर्तव्य गरि मारेको देखिन्छ ।’
मृतक देविसराले सोमबार मात्रै पेन्सन बुझेकी थिइन् । कति पैसा बुझेकी थिइन् भन्ने यकिन नभएको डिएसपी काफ्ले जानकारी दिए । घुम्ती पसलमा समेत ५ रुपैयाँ मात्रै भेटिएको उनले बताए । पेन्सनमा बुझेको र पसलमा भएको सबै पैसा लिएर ज्वाइँ फरार भएको प्रहरी जनाएको छ ।
सोमबार राति नै हत्या भएको पनि मंगलबार बेलुका ४ बजे मात्रै प्रहरीले खबर पाएको थियो । पैसा लिन पुगेकी छिमेकीले साढे ३ बजे तिर गुम्तीमा पुग्दा देविसराको लास देखेपछि प्रहरीलाई खवर गरेकी थिइन्।
घटना स्थलमा ज्वाई हस्तबहादुरको पर्स मोबाइल र फोटो भेटिएको छ । प्रहरीले ज्वाइँले हत्या गरेको पुष्टि हुँदै गएको बताएको छ ।
घाँटीमा गलबन्दी र सलले कसेर देविसराको हत्या भएको प्रहरीले जनाएको छ । मृतक देविसराको घाँटीमा सल र गलबन्दीको डाम र गालामा निलडाम देखिएको छ ।
साउदी अरबमा रहेकी छोरीलाई घटनाको बारेमा खबर गरिसकेको प्रहरी नायब उपरीक्षक काफ्लेले जानकारी दिए। काफ्लेले घटना विस्तृत अनुसन्धान भइरहेको बताए । उनले फरार रहेका हस्तबहादुरको खोजी कार्य भइरहेको जानकारी दिए ।
प्रतिक्रिया दिनुहोस !
