सात अर्ब ठगीमा बस्नेत समातिए

काठमाडौः सहकारी संस्था र घरजग्गा (रियल स्टेट) कारोबारमा झन्डै सात अर्ब रुपैयाँ ठगी गरी फरार सुधीर बस्नेत बुधबार पक्राउ परेका छन् । बस्नेतलाई काठमाडौं जिल्ला अदालतबाटै अन्तिम भएको एउटा मुद्दाको फैसला कार्यान्वयनका क्रममा राजधानीको धापासीबाट पक्राउ गरिएको हो । उनीविरुद्ध अन्य अदालतमा समेत ठगीसम्बन्धी थप मुद्दा फैसला भएकाले लगत संकलन भइरहेको छ ।

‘एउटा मुद्दामा भएको फैसला कार्यान्वयनका सन्दर्भमा हामीले प्रहरीको सहयोगमा बस्नेतलाई समातेका हौं । अरु फैसला पनि कलेक्सन गर्दैछौं । त्यसपछि थप कारबाहीमा जान्छौं,' काठमाडौं जिल्ला अदालतका तहसिल प्रमुख सन्तोष पराजुलीले अन्नपूर्णसँग भने, ‘जिल्लाबाट फैसला भएपछि पुनरावेदन नगरी फरार रहेको अवस्थामा पक्राउ गरिएको हो ।'

पराजुलीले भक्तपुर, कास्की, स्याङ्जालगायत जिल्लामा पनि ठगीका अरू मुद्दामा कारबाही बाँकी रहेको सूचना प्राप्त भएको बताए । अदालतको फैसला कार्यान्वयन एकाइ, काठमाडौं प्रहरी परिसर र अपराध अनुसन्धान महाशाखाको टोलीले उनलाई बिहान धापासीस्थित घरबाटै पक्राउ गरेको हो ।

ठगीका उजुरी र अदालतका फैसलापछि बस्नेत भारतमा लुकेर बसेको सूचनाका आधारमा प्रहरीले उनीमाथि निगरानी बढाएको थियो । बस्नेत मंगलबार मात्रै भारतबाट फर्केका थिए ।

प्रहरी आएको थाहा पाएपछि घरपछाडिको पर्खालबाट भाग्ने क्रममा बस्नेतको बायाँ हातमा सिसाले काटेर चोट लागेको छ । बस्नेतविरुद्ध चलेको एउटा ठगी मुद्दामा अदालतले चार लाख ९४ हजार रुपैयाँ जरिबाना र ६ महिना कैद र अर्कोमा सोही अदालतबाट पाँच करोड, ९१ लाख, ९७ हजार, नौ सय ४५ रुपैयाँ जरिबाना र दुई वर्ष कैद सजाय तोकेको छ ।

भक्तपुर जिल्ला अदालतले पनि २०७२ मंसिरमा ८४ हजार ६ सय ४८ रुपैयाँ जरिबाना र दुई वर्ष कैद हुने फैसला गरेको छ । ‘यी तीनवटै मुद्दामा फैसला भएर पनि बस्नेत अदालतको सम्पर्कमा नआएपछि फरार सूचीमा राखेर खोजी गरिरहेका थियौं', परिसरका एसपी प्रद्युम्न कार्कीले भने, ‘एउटा मुद्दामा असुल्न बाँकी सजाय ठेक्न बस्नेतलाई पक्राउ गरिएको हो ।'

प्रहरीका अनुसार बस्नेतविरुद्ध सहकारीबाट सर्वसाधारणको चार अर्बभन्दा बढी निक्षेप अपचलन, विभिन्न १४ वटा बैंकबाट एक अर्ब ६० करोड ऋण र झन्डै आठ हजार सर्वसाधारणलाई ठगी गरेको आरोप छ ।

काठमाडौं प्रहरीका अनुसार बस्नेतले ओरियन्टल बिल्डर्स एन्ड डेभलोपर्सका नाममा ३४ करोड, आयुसा बिल्डर्सका नाममा २१ करोड, कोहिनूर बिल्डर्सका नाममा १४ करोड, कोहिनूर हिल हाउजिङका नाममा ५६ करोड, रोसिडेल डेभ्लपर्सका नाममा ११ करोड, बीबी नेपाल ट्रेड कन्सर्नका नाममा तीन करोड र दीपाज बिजनेस कन्सर्नका नाममा चार करोड रुपैयाँ बैंक र व्यक्तिबाट लिएको देखिएको छ ।

पक्राउपछि प्रहरीले बस्नेतलाई बुधबार काठमाडौं जिल्ला अदालत पेस गरेको थियो । अदालतको आदेशपछि उनलाई प्रहरीले डिल्लीबजार सदरखोर चलान गरेको छ ।

 अर्बाै ठगी भएको छः कार्की

बचत तथा ऋण कारोबार गर्ने समस्याग्रस्त सहकारी संस्थाको छानबिन गर्न गठित जाँचबुझ आयोगका अध्यक्ष गौरीबहादुर कार्कीले बस्नेतबाट झन्डै सात अर्ब रुपैयाँ ठगी भएको प्रतिवेदन सरकारलाई बुझाएको बताएका छन् ।

सरकारले २०७० कात्तिक १४ मा पूर्वन्यायाधीश कार्कीको अध्यक्षतामा जाँचबुझ आयोग गठन गरेको थियो । आयोग सदस्यमा सहकारी विज्ञ सीताराम उपे्रती र सुशीलराम माथेमा थिए ।

बस्नेत र अन्य सहकारीबाट भएको ठगी विवरणसहित आयोगले तत्कालीन प्रधानमन्त्री सुशील कोइरालासमक्ष २०७१ जेठ २ मा प्रतिवेदन कारबाहीका लागि बुझाएको थियो ।

पीडितका उजुरीमात्रै ६ हजार आठ सय ९४ थिए । कार्कीका अनुसार बस्नेत अध्यक्ष रहेको ओरियन्टियल ऋण तथा बचत सहकारी संस्थाविरुद्ध ब्याजबाहेक साँवामात्र चार अर्ब २० करोड रुपैयाँ ठगीको आरोपमा उजुरी परेको थियो ।

ब्याजमात्र एक अर्ब २९ करोड रुपैयाँ दाबी छ । दुवै गरी करिब पाँच अर्ब ५० करोडको दाबी छ । यता हाउजिङमा एक अर्ब ३६ करोड रुपैयाँ ठगीको आरोपमा उजुरी थियो । ‘बस्नेतले कुल ६ अर्ब ८६ करोड ठगी गरेको प्रतिवेदन निष्कर्ष छ', कार्कीले भने, ‘दोषीलाई कडा कानुनको व्यवस्था हुन सहकारी ऐनमा संशोधन गर्न पनि सुझाइएको थियो । तर विधेयक संसद्मा विचाराधीन छ ।'