काठमाडौंः टोपी दिवसको विरोध गरेपछि आलोचित भएका नयाँ शक्ति नेपालका संयोजक डा. बाबुराम भट्टराईले टोपीसँग आफ्नो जन्मजात साइनो रहेको सार्वजनिक गरेका छन् ।
आइतबार अर्थात् जनवरी १ मा मनाइएको टोपी दिवसप्रति आक्रोश व्यक्त गर्दै ट्वीट गरेका पूर्वप्रधानमन्त्री समेत रहेका बाबुरामले मंगलबार भने टोपीसँग आफ्नो जन्मजात साइनो भएको बताएका छन् ।
टोपी दिवसको विरोध गर्दै ट्वीट गरेपछि सामाजिक सञ्जालमा उनको चर्को आलोचना भइरहेको छ । यही आलोचनाकै बीचमा उनले आफ्नो टोपीसँगको साइनो जन्मजात भएको उल्लेख गरेका हुन् ।
विद्यार्थी जीवनमा ढाका टोपी लगाएर खिचेको तस्बिर राखेर बाबुरामले मंगलबार ट्वीट गरेका हुन् । उनले ट्वीटमा आफूलाई टोपी विरोधीको रुपमा प्रस्तुत गर्नु तर्कसंगत नभएको उल्लेख गरेका छन् ।
‘बाबुराम र टोपीको जन्मजात साइनो छ है ! बाबुरामलाई टोपी विरोधीको रुपमा प्रस्तुत गर्नु तथ्यसंगत, तर्कसंगत, न्यायसंगत..., ’ बाबुरामले ट्वीटरमा लेखेका छन् ।
बाबुराम र टोपीको जन्मजात साइनो छ है! बाबुरामलाई टोपी विरोधीको रुपमा प्रस्तुत गर्नु तथ्यसंगत, तर्कसंगत, न्यायसंगत... https://t.co/9YY1HLfOQB
— Baburam Bhattarai (@brb1954) January 3, 2017
आइतबार भने बाबुरामले जनवरी १ मा टोपी दिवस मनाउनेले कुनै दिन धोती दिवस मनाउने भन्दै आक्रोश व्यक्त गरेका थिए । बाबुरामले टोपी दिवसको विरोध गर्दा बख्खु र धोती शब्दको अपमानित ढंगले प्रयोग गरेको भन्दै सबै समुदायका मानिसले बाबुरामप्रति आक्रोश व्यक्त गरिरहेका छन् ।
टोपी दिवस रे!अब बख्खु दिवस! धोती दिवस!..संविधान र राष्ट्रगानमा समेत बहुजाति र बहुसांस्कृति स्वीकारीसकेको देशमा एकलसंस्कृतिका कुरा कति जायज़?
— Baburam Bhattarai (@brb1954) January 1, 2017
प्रतिक्रिया दिनुहोस !
