ओलीबारे लेखकले भनेः ‘सपना देखाए देश ब्युँताए'(भिडियाेसहित)
काठमाडौंः एमाले अध्यक्ष केपी शर्मा ओलीले बोल्ने कार्यक्रममा धेरै श्रोता उत्सुक र जिज्ञासु हुन्छन् । उनीहरू ओलीबाट केही न केही रोचक टिप्पणीको अपेक्षा गरेर बसिरहेका हुन्छन् ।
शुक्रबार तिनै ओली प्रमुख अतिथि थिए । उनको पछाडि उनकै बडेमानको फोटो राखिएको थियो, जसमा लेखिएको थियो, ‘म प्रधानमन्त्री छँदा ।' उनले प्रधानमन्त्री रहँदा औपचारिक रूपमा सार्वजनिक गरेका भनाइ र अन्तर्वार्ता समेटेर प्रेस चौतारी नेपालले तयार गरेको पुस्तक लोकार्पण कार्यक्रम थियो त्यो ।
पोखरामा हालै सम्पन्न जनवर्गीय संगठन भेलाको निर्णयबमोजिम यस कार्यक्रममा पनि कुनै माला, खादा र ब्याच थिएन । वक्ता र प्रमुख अतिथि, कार्यक्रमका सभापतिबाहेक सबै दर्शकदीर्घामा थिए । एमाले महासचिव ईश्वर पोखरेललगायत पदाधिकारी र शीर्ष नेता कार्यक्रममा सहभागी थिए ।
ओली प्रमुख अतिथि भएको कार्यक्रममा प्रायः भाषणको बजार उनकै पक्षमा हुन्थ्यो । तर हिजो भने उनको बजार अरूले कब्जा गरिदिए । उनलाई कुनै राजनीतिज्ञले होइन, लेखक तथा पत्रकारले ‘विस्थापित' गरेका थिए । त्यो पनि उनकै बारेमा विश्लेषण गरेर ।
‘केपी ओली त ठेट पूर्वेली भाषामा बोल्नुहुन्छ । त्यसको छाप बेग्लै छ । उहाँको यो बोल्ने शैली नेपाली गृहिणीलाई खुब मन पर्छ । त्यसमाथि उहाँजस्तो प्रभावशाली वक्ताले बोलेका कुरामा टिप्पणी गर्नु अति नै गाह्रो कुरा हो', लेखक श्रीकृष्ण अनिरुद्ध गौतमले आफ्नो भनाइ सुरु गरे । उनले ओली प्रधानमन्त्री बन्दा आफू सकारात्मक नभए पनि समयक्रमले त्यो सोचाइ गलत सावित गरिदिएको उनले बताए ।
‘एउटा मान्छे ऊ नै हो, जसले देशमा विकास हाम्रै पालामा सम्भव छ भन्यो । प्रधानमन्त्रीका रूपमा देशवासीलाई अब केही हुन्छ भनेर सपना देखायो ।' अनिरुद्ध गौतम
चीनसँग यातायात तथा पारवहन सन्धि भएपछि ओलीको व्यक्तित्वले शिखर छोएको र त्यहीँबाट उनलाई प्रधानमन्त्रीबाट हटाउने षड्यन्त्र भएको उनले दाबी गरे । ‘एउटा मान्छे ऊ नै हो, जसले देशमा विकास हाम्रै पालामा सम्भव छ भन्यो । प्रधानमन्त्रीका रूपमा देशवासीलाई अब केही हुन्छ भनेर सपना देखायो । तर हामीमध्ये त्यस्ता नेपाली पनि रहेछौं- सामाजिक सञ्जालमा कागजका नौका बनाएर त्यसलाई उडाइयो । अझ बालुवाटार अगाडि कागजका नौका प्रदर्शन गरेर गरिएको विरोध त्यही बेला हेर्न पाइयो', उनले भने ।
अर्का लेखक कृष्णमुरारी भण्डारीले ओलीलाई म्याक्सिम गोर्कीकी हजुरआमासँग तुलना गरे । ‘देश अब सिद्धियो, गयो, कोमामै पुग्यो भनेर हरेक नेपालीले छाती पिटिरहेका बेला केपी ओलीले ब्युँताए । मलाई त दक्षिण एसियामै उनको उचाइको नेता छैन जस्तो लाग्छ । मैले त लेखेँ पनि, नेपालमा पृथ्वीनारायण शाह, बीपी कोइराला र केपी ओलीलाई नै मान्नुपर्छ', उनको टिप्पणी थियो ।
पत्रकार विजय पाण्डेले आफूले कसैलाई पनि माननीय भनेर सम्बोधन नगरेको भन्दै अब ओलीलाई त्यो सम्बोधन गर्ने बताए । ‘मैले जिन्दगीमा कसैलाई पनि माननीय भनेर सम्बोधन गरेको छैन तर जिन्दगीभर ओलीजीलाई माननीय भन्नेछु । पदमा रहँदा होस् या नरहँदा । ओलीजी प्रधानमन्त्री हुँदा बालुवाटारमा भेटेर माननीय भनेको होइन', पत्रकार विजय पाण्डेले टिप्पणी गरे । मानवअधिकारकर्मी चरण प्रसाईंले ओली लाइट र हाइट दुवै भएको नेता भनेर टिप्पणी गरे । कार्यक्रममा अन्तिम वक्ता रहेका ओलीले भने सबै वक्तालाई धन्यवाद र आभार दिए । उनी आफूले भने भाषणमा धेरै समय खर्च गरेनन् ।
भिडियाे हेर्नुहाेस्
प्रतिक्रिया दिनुहोस !
