समाजसेवी चौधरीलाई अमरसिंह थापा स्मृति सम्मान
काठमाडौं (अन्नपूर्ण): राष्ट्रिय विभूति बडाकाजी अमरसिंह थापाको २०१औं स्मृति दिवसका अवसरमा वरिष्ठ समाजसेवी तथा संस्कृतिविद् महेश चौधरीलाई अभिनन्दन गरिएको छ।
अमरसिंह थापा प्रतिष्ठानले राष्ट्रिय प्रज्ञा प्रतिष्ठान कमलादीमा गरेको कार्यक्रममा प्रज्ञा प्रतिष्ठानका उपकुलपति गंगाप्रसाद उप्रेतीले चौधरीलाई अभिनन्दन गरेका हुन्। संस्कृतिविद् चौधरीलाई सम्मानपत्र र नगद २५ हजारले अभिनन्दन गरिएको थियो।
सभाको सभापतित्व अमरसिंह थापा प्रतिष्ठानका अध्यक्ष बाबुराम थापाले गरेका थिए। कार्यक्रममा प्रा. डा. सुरेन्द्र केसी, प्रा. डा. शोभा पोखरेल, राजाराम सुवेदीलगायतले मन्तव्य राखेका थिए।
मन्तव्यका क्रममा अधिकांश वक्ताले राज्यले राष्ट्रिय विभूतिलाई उपेक्षा गरेको बताएका थिए। चौधरीले नेपाली संस्कृतिसम्बन्धी दर्जनौं पुस्तक प्रकाशन गरिसकेका छन्।
प्रतिक्रिया दिनुहोस !
