भेनेजुएलामा विवादबीच संविधान पुनर्लेखनको तयारी

काराकस : भेनेजुएलाका राष्ट्रपति निकोलस मादुरोले संविधान पुनर्लेखनका लागि आवश्यक एक निकाय स्थापनाको तयारी गरेका छन् ।यहाँ हालै सम्पन्न संविधानसभा निर्वाचनको वैद्यतामाथि नै प्रश्न उठेका बेला राष्ट्रपतिले संविधान पुनर्लेखनको तयारी थालेका हुन् । उनको यस योजनाको अन्तर्राष्ट्रिय रूपमा तीव्र आलोचना भएको छ । यस निर्वाचनमा हिंसा भएर २८ जनाको ज्यानै गएको थियो ।

भेनेजुएलामा गत आइतबार सम्पन्न विवादास्पद सविधानसभाको निर्वाचनपछि मादुरोको यो निर्णय आएको हो । उक्त निर्वाचन विपक्षीले बहिष्कार गरेका थिए ।

अन्तरर्राष्ट्रिय रूपमा भएको यस आलोचनामा कसैले ‘कु' को संज्ञा दिएका छन् भने कतिपय देशले गैरकानुनी निर्वाचन भनेका छन् । यस निर्वाचनपछि भेनेजुएलामा राजनीतिक र आर्थिक संकट गहिरिएको छ । यस निर्वाचनमा धाँधली गरेको भन्दै विपक्षीले विश्व समुदायलाई उक्त निर्वाचनलाई मान्यता नदिन आग्रह गरेका छन् ।

यसैबीच विपक्षीले नयाँ संविधान लेखनका लागि भएको भनिएको सरकारी तयारीको विरोधमा प्रदर्शनको तयारी गरिरहेको छ । यद्यपि राष्ट्रपतिले भने शुक्रबारसम्म संविधान लेखनका लागि गठन गरिने नयाँ निकायलाई शपथ ग्रहण नै गराउने अडानका साथ तयारी थालेको बताइएको छ । उता विपक्षीहरूले भने सरकारको यस तयारीलाई अवरुद्ध पार्ने गरी आन्दोलन गर्ने जनाएका छन् ।

करिब २८ व्यक्तिको ज्यान गएको यस तनाव अन्त्य गर्ने गरी भन्दै सरकारद्वारा एकलौटी रूपमा गठन गर्न लागिएको यस संविधान लेखनसम्बन्धी निकायलाई सबै विपक्षीले अस्वीकार गरेका छन् । संविधानसभाबाट निर्वाचित नयाँ सदस्य संख्या ५४५ रहेको छ । उक्त निर्वाचनमा विपक्षी दलका तर्फबाट एकजना पनि उम्मेदवार विजयी भएका छैनन् । यस निर्वाचनमा राष्ट्रपति मादुरोकी श्रीमती र छोरासमेत संविधानसभा सदस्यका रूपमा निर्वाचित भएका छन् । अमेरिकाले मादुरो सत्तामा रहिरहन चाहेको आरोप लगाएको छ । ब्राजिलले यस निर्वाचनलाई सत्ता पलटको संज्ञा दिएको छ ।

भेनेजुएलाका राष्ट्रपति निकोलस मादुरोले यस निर्वाचनमा आफू विजयी भएको दाबी गर्दै आएका छन् । यस निर्वाचनलाई देशभित्र र बाहिरबाट पनि स्वीकार गरिएको छैन । भेनेजुएलाका प्रमुख निर्वाचन अधिकारीले नै यस निर्वाचनमा ४१.५३ प्रतिशत मात्र भोट खसेको बताएका छन् । त्यसै कारण पचास प्रतिशत पनि मत नखसेको निर्वाचनलाई मान्यता दिन नहुने विदेशी समुदायको माग छ ।

भेनेजुएलाको प्रतिपक्षी गठबन्धन समूह डेमोक्रेटिक युनिटी राउन्ड टेबल (एमयुडी)ले वर्तमान राष्ट्रपति निकोलस मादुरोले अब भेनेजुएलाको राजनीतिक संकट समाधान गर्न नसक्ने बताएका छन् । आर्थिक संकटसमेत चुलिएको भन्दै विगत चार महिनादेखि विपक्षीहरूले आन्दोलन जारी राखेका छन् । आन्दोलनका क्रममा १२० नागरिकको ज्यान गएको छ । —रासस÷एएफपी