पलेँटीमा मीनाको एकल गायन

काठमाडौं : नेपालयको 'आर' शालामा अंग्रेजी महिनाको अन्तिम शुक्रबार आयोजना हुने गरेको सांगीतिक शृंखला पलेँटीमा यस पटक संगीतकार आभासले गायिका मीना निरौलामार्फत आफ्ना सिर्जनाहरू प्रस्तुत गर्ने भएका छन् । नेपाली चलचित्र संगीतमा अहिले चर्चित गायिका मीना झन्डै एक दशक पहिलेदेखि पलेँटीसित आबद्ध गायिका हुन् ।

मीनाले यसभन्दा पहिले गीतकार रत्नशमशेर थापा, किरण खरेल, राममान तृषित, दिनेश अधिकारी र संगीतकार अम्बर गुरुङ, शान्ति ठटाललगायतसँग दर्जनौं पलेँटीमा आफ्नो सहगायन प्रस्तुत गरिसकेकी छन् । यसपालिको पलेँटी भने मीनाको एकल गायनको पहिलो पलेँटी हुनेछ ।

संगीतकार आभासले पलेँटीलाई प्रारम्भदेखि नै संयोजन गर्दै आइरहेका छन् । सन् २००६ मा पलेँटीले दार्जिलिङका नेपालीभाषी कलाकारलाई पनि समेट्न सुरु ग¥यो । सन् २००७ मा यसको दायरा अझै फराकिलो पार्ने उद्देश्यले संगीतकार आभास भारतको उत्तरपूर्वी राज्यहरूको भ्रमणमा निस्के । मनिपुर पुगेपछि उतै काङ्लातुम्बीका अगुवा कलाकार शान्तनुकुमार लिम्बू पलेँटीका लागि निम्त्याइए । शान्तनुमार्फत नेपालमै घरजम गरेर भित्रिएकी मीनाको पलेँटीमा प्रवेश भएको थियो ।

आभासले यसपालिको पलेँटीमा मीनाका निम्ति नयाँ र पुराना गरेर १६ वटा गीत छानेका छन् । केही युगल गीत पनि रहने छन् जसलाई आभास आफैंले मीनाका साथ प्रस्तुत गर्नेछन् । यासपालिको पलेँटीका निम्ति छानिएका गीतमा वैरागी काइँला, मञ्जुल, दिनेश अधिकारी, श्रवण मुकारुङ र आभासका शब्दहरू रहेका छन् ।

संगीतकार आभासले मीनाकै स्वरका लागि सिर्जना गरेका नयाँ गीतहरू पनि यसपालिको पलेँटीमा पहिलोपल्ट प्रस्तुत हुनेछन् । गायिका मीना निरौला र बेनुका राईलाई साथमा लिएर संगीतकार आभासले केही महिनापहिले तीन दर्जनभन्दा धेरै बालगीतहरू रेकर्ड गराएका छन् । मीनाले नेपालयले पुस्तकसहित प्रकाशन गर्ने तयारी गरिरहेका बालगीतहरूको केही झलक पनि प्रस्तुत गर्नेछिन् । यो महिनाको पलेँटी २५ अगस्ट शुक्रबारको साँझ कालिकामार्गस्थित नेपालयको 'आर'शालामा हुनेछ ।