आफ्ना उत्पादनबारे के भन्छन् अटो व्यवसायी ?

रेनल्ट

नेपालका लागि रेनल्ट गाडीको आधिकारिक बिक्रेता एडभान्स अटोमोबाइल्स प्रालि हो । प्रालिले नेपाली बजारमा तीन मोडलका कार बिक्री गर्दै आएको छ । रेनल्टका कार निर्माता कम्पनी फ्रान्स भए पनि यो अहिले भारतमै उत्पादन हुन्छ । नेपाली बजारमा इन्ट्री लेभल र एसयूभी कारको माग बढ्दो छ । कम्पनीले भने सोहीअनुसारको प्रडक्ट बजारमा ल्याउन सफल भएको छ । त्यसैले, छोटो समयमै ग्राहकको मन जित्न सफल भएको कम्पनीको दाबी छ ।

नेपाली अटो बजारमा रेनल्टका कार टप थ्रीमा पर्न सफल भएको कम्पनीले बताएको छ । नेपाली बजारमा रेनल्टका डस्टर, क्विड र लजी मोडलका कार उपलब्ध छन्, यिनको मूल्य न्यूनतम १७ लाखदेखि अधिकतम ५६ लाख रुपैयाँसम्म रहेको छ । ग्राहकले रेनल्टका गाडीमा विश्वास गर्नु र किन्नुपर्ने प्रमुख कारण नेपालको सडकसुहाउँदो ग्राउन्ड क्लिरेन्स नै भएको कम्पनीको भनाइ छ ।

रेनल्टका गाडीको बुट स्पेस, सजावट, डिजाइन, माइलेज र इन्जिन क्षमता नै ग्राहकको मन जित्न सक्ने आधार भएको कम्पनीका जनरल म्यानेजर अधिकुमार श्रेष्ठले बताए । कम्पनीले प्रति १० हजार किलोमिटरमा सर्भिस सेवा दिने गरेको छ भने पाँच वर्षको वारेन्टी पनि उपलब्ध गराएको छ । साथै रेनल्ट गाडीका पार्टपुर्जा रिजनेबल मूल्यमा सहजै पाउन सकने श्रेष्ठको भनाइ छ ।

डाट्सन

डाट्सन गाडीका लागि नेपालको आधिकारिक बिक्रेता पायोनियर मोटर कर्प प्रालि हो । कम्पनीले नेपालमा तीन मोडलका पाँच भेरियन्टका कार बिक्री गर्दै आएको छ । डाट्सन गाडीको उत्पादन भारतमा हुन्छ । कम्पनीले बजारमा रेडी गो टी, रेडी गो एस, गो प्लस र गो भेरियन्टका गाडी बिक्री गर्दै आएको छ । डाट्सन गाडी नेपाली बजारमा न्यूनतम १४ लाखदेखि २६ लाख २९ हजार रुपैयाँसम्ममा उपलब्ध छ । डाट्सन नेपाली बजारमा प्रवेश गरेको तीन वर्ष मात्रै हुँदै छ । यति छोटो अवधिमा पनि कम्पनीले वार्षिक १५ सयको हाराहारीमा कार बिक्री गर्दै आएको छ ।

कम्पनीले बजारमा उपलब्ध गराएका कार बाइकको विकल्प बन्दै आएका छन् । कम्पनीले उपलब्ध गराएका सबै कारको मूल्य इन्ट्री लेभलअन्तर्गत नै छन् । प्रालिका सिनियर सेल्स प्रमुख विपीन बस्नेतका अनुसार नेपाली ग्राहकका लागि उपयुक्त मूल्यकै कारण डाट्सनका गाडी लोकप्रिय भइसकेको छ । नेपाली सडक सुहाउँदो, ग्राउन्ड क्लियरेन्स, माइलेज, सस्तो मर्मत शुल्क, युवापुस्तालाई लक्ष्य गरी तयार गरिएको सजावट र डिजाइकै कारण डाट्सनले नेपालीको मन जित्न सफल भएको उनको दाबी छ ।

महिन्द्रा

नेपालका लागि महिन्द्रा गाडीको आधिकारिक बिक्रेता अग्निइन्कर्पोरेटेड प्रालि हो । प्रालिले भारतमा उत्पादन हुने जिप तथा स्कार्पियो गाडी बिक्री गर्दै आएको छ । प्रालिले नेपाली बजारमा पाँच मोडलका गाडी बिक्री गर्दै आएको छ । साथै महिन्द्राले नेपाली बजारमा विद्युतीय कार पनि बिक्री गर्दै आएको छ ।

प्रालिका सेल्स प्रमुख वरदान बस्नेतका अनुसार महिन्द्राले मासिक ५ सयको हाराहारीमा गाडी बेच्दै आएको छ । महिन्द्रा गाडी नेपाली बजारमा न्यूनतम २७ लाखदेखि ७५ लाख रुपैयाँसम्ममा पाइन्छ।

साथै प्रालिले नेपाली बजारमा बिक्री गर्दै आएको विद्युतीय कारको ईटूओको मूल्य भने २६ लाख रुपैयाँ तोकेको छ । प्रालिले बिक्री गर्दै आएको गाडी अफ रोड तथा सहरी दुवै क्षेत्रका लागि उपयुक्त भएको दाबी गरेको छ । गाडीको ग्राउन्ड क्लिरेन्स नेपाली सडक सुहाउँदो भएको बस्नेत बताउँछन् । सुरक्षाका हिसाबले महिन्द्राका गाडी बढी बिक्री हुने गरेको कम्पनीको दाबी छ । गाडी सानो र ठूलो दुवै किसिमको परिवारका लागि उपयुक्त छ ।

पावर र इन्जिन नै गाडीको प्रमुख विशेषता रहेको बस्नेतको भनाइ छ । देशका जुनसुकै भागमा पनि महिन्द्राका गाडी मर्मत गर्न सकिने कम्पनीले जानकारी दिएको छ । साथै गाडीका पार्जपुर्जा पनि सहजै पाउन सकिने कम्पनीको दाबी छ ।

टाटा

टाटा गाडीका लागि नेपालको आधिकारिक बिक्रेता सिप्रदी ट्रेडिङ प्रालि हो । टाटाका गाडी भारतमै उत्पादन हुन्छन् । नेपाली बजारमा साना र ठूला गरी टाटाका ४० मोडलका गाडी उपलब्ध छन । आफूहरू नेपाली बजारमा सबैभन्दा बढी गाडी बिक्री गर्ने कम्पनी भएको कम्पनीका असिस्टेन्ट जनरल म्यानेजर सावन्त सिजापतिको दाबी छ । चार्डपर्व सुरु भएसँगै मार्केट बढेको उनले बताए । बजारमा टाटाका कार मात्रै १० मोडलका २० भेरियन्टमा उपलब्ध छन् । टाटाका गाडीको नेपाली बजारमा न्यूनतम मूल्य २१ लाख देखि ७५ लाख रुपैयाँसम्म छ ।

गाडीको प्रमुख विशेषता भनेको इन्जिन नै हो । नेपाली बजारका आएका टाटाका कार सबैभन्दा नयाँ प्रविधिका छन् । त्यसमा पनि गाडीको स्पेस, आकर्षक डिजाइन र सवाजट सबै वर्गका लागि सुहाउँदो भएको उनको दाबी छ ।

सहरी तथा ग्रामीण दुवै सडकमा चलाउन मिल्ने ग्राउन्ड क्लिरेन्स भएको उनले बताए । टाटा गाडी सर्भिसका लागि देशभर पाँच सय सर्भिस सेन्टर भएको उनको दाबी छ । टाटाका साना गाडीको पार्टपुर्जा बिक्री पसल मात्रै २४ र ठूलाको पार्टपुर्जा बिक्री गर्ने ३२ वटा पसल रहेको कम्पनीले जानकारी दिएको छ ।

अशोक लेल्यान्ड

अशोक लेल्यान्ड गाडीका लागि नेपालको आधिकारिक बिक्रेता आईएमई मोटर प्रालि हो । प्रालिले नेपालमा अशोक लेल्यान्डले उत्पादन गर्दै आएका एक सयभन्दा बढी मोटलका पिकअफ, ट्र्याक्टर टेलर, टिपर र बस बिक्री गर्दै आएको छ । सरकारले ठूला बस आयातमा दिएको सहुलियत र प्राथमिकताका कारण व्यापार राम्रो रहेको कम्पनीका कपिल शिवाकोटीले बताए ।

कम्पनीले १९ लाख रुपैयाँदेखिका साना पिकअप, ५० लाख रुपैयाँभन्दा बढी मूल्यका ट्र्याक्टर टेलर, २३ लाखदेखि ७० लाख रुपैयाँसम्मका टिपर र २६ लाख रुपैयाँभन्दा माथिका १६ देखि एक सय सिटसम्मका बस बिक्री गर्दै आएको छ । अहिले मासिक एक सय ५० भन्दा बढी ठूला सिटी बस पनि बिक्री भइरहेको उनले बताए ।

 

महिन्द्रा : हेभी इक्विपमेन्ट

महिन्द्राको महिन्द्रा हेभी इक्विपमेन्ट नेपालका लागि आधिकारिक बिक्रेता दुगड ब्रदर्स एन्ड सन्स प्रालि हो । कम्पनीले सन् २०१५ देखि ब्याकहो लोडर बिक्री गर्दै आएको छ । कम्पनीले यसबाहेक लोडर, क्रेन र ग्रेडर गरी चार मोडल हेभी इक्विपमेन्ट बिक्री गर्दै आएको छ । पुनर्निर्माणले तीव्रता पाइरहेको अवस्थामा हेभी इक्विपमेन्टको व्यापार बढ्दो रहेको कम्पनीका सेल्स प्रमुख दिनेश कोइरालाले बताए ।

नेपालमा अहिले बिक्री गरिरहेको हेभी इक्विपमेन्ट अन्य कम्पनीको तुलनामा बढी कोपड ठूलो र इन्धन कम लाग्ने रहेको कम्पनीले जनाएको छ । भारतमा उत्पादन हुने हेभी इक्विपमेन्ट मर्मत गर्नुपरेको अवस्थामा काम गरिरहेकै स्थानमा गएर गरिने उनले बताए । अहिले बजारमा महिन्द्राका हेभी इक्विपमेन्ट न्यूनतम ३० लाखदेखि ७० लाख रुपैयाँमा उपलब्ध छन् ।

यामाहा

बाइक तथा स्कुटर बजारमा यामाहाको एउटा पृथक् पहिचान छ । नेपालमा भित्रिएको ४५ वर्षभन्दा बढीको अवधिमा यामाहाका उत्पादनले नेपाली ग्राहकको मन जित्न सफल भएका छन् । नेपालका लागि यामाहाको आधिकारिक बिक्रेता एमएडब्ल्यू इन्टरप्राइजेज प्रालिले पनि नेपाली ग्राहकको माग र परिवेशअनुसारका उत्पादन बजारमा उपलब्ध गराउँदै आएको छ ।

कम्पनीले नेपालमा अहिले सबै सेग्मनेन्टका बाइक तथा स्कुटर बिक्रीवितरण गरिरहेको छ । कम्पनीले माइलेज चाहने ग्राहकका लागि माइलेज सेग्मेन्ट, स्पोर्ट लुक्स चाहने ग्राहकलाई स्पोर्ट सेग्मेन्टका बाइक तथा स्कुटर बजारमा ल्याएको छ । टेक्नोलोजी, कार्यक्षमता, टिकाउपन र इको फ्रेन्ड्ली बाइकका रूपमा रहेको यामाहाका बाइक ग्लुको टेक्नोलाजीमा आधारित छन् ।

बजारमा कम्पनीको आर१५, एफजेड२५, एफजेड एक्सएफआइ, एफजेड एफआई, एजेडआरआर, सलुटोलगायत बाइक छन् । कम्पनीले बजारमा एक लाख २५ हजारदेखि आठ लाख ९५ हजार नौ सय रुपैयाँसम्मका बाइक र स्कुटरमा फ्यासिनो, रे-जेडआर (डिक्स र ड्रम) र रे-जेड गरी चार मोडल उपलब्ध गराएको छ । यिनको बजार मूल्य एक लाख ७७ हजार नौ सयदेखि एक लाख ९९ हजार नौ सय रुपैयाँसम्म रहेको कम्पनीका असिस्टेन्ट मार्केटिङ म्यानेजर विनोद महर्जनले जानकारी दिए ।

टीभीएस

जगदम्बा मोटर्स प्रालि टीभीएसका बाइक तथा स्कुटरको नेपालका लागि आधिकारिक बिक्रेता हो । आफ्टर सेल्स सर्भिस र बाइक तथा स्कुटरमा प्रयोग भएको टेक्नोलोजीका कारण नेपाली बजारमा टीभीएस परिचित छ । कम्पनीले आफ्ना ग्राहकलाई लक्ष्य गर्दै सबै रेन्जका बाइक भिर्‍याएको छ । टीभीएसको नेपाली बजारमा सयदेखि दुई सय सीसीसम्मका बाइक उपलब्ध छन् ।

स्टार सिटी प्लस, स्टार स्पोर्ट्स, भेक्टर, स्ट्राइकर, फिनिक्स, अपाचे आरटीआर छन् । यिनको मूल्य एक लाख ५० हजारदेखि दुई लाख ९१ हजार रुपैयाँसम्म रहेको कम्पनीले जानकारी दिएको छ । स्कुटरमा एक लाख ६७ हजारदेखि एक लाख ९३ हजार रुपैयाँसम्मका लिगो, जुपिटर, जेस्ट मोडल रहेको जगदम्बा मोटर्स प्रालिका उपाध्यक्ष दीपक अग्रवालले बताए ।

हिरो

‘भ्यालु फर मनी’का रूपमा हिरोको बाइक नेपालमा चिनिएका छन् । पैसा खर्च गरेर त्यसको सही प्रतिफल चाहने ग्राहकका लागि हिरोका उत्पादन सबैभन्दा प्रभावकारी छन् । पारिवारिक मानिसका लागि सबैभन्दा उपयुक्त हुन्छ । माइलेज अनि यसको कार्यक्षमताले पनि ग्राहक हिरोका बाइकमा आकर्षित भएका हुन् । नेपाल जनरल मार्केटिङ प्रालिले हिरोका बाइक तथा स्कुटरको आधिकारिक बिक्रेताका रूपमा रहेर काम गर्दै आएको छ ।

यहाँ हिरोको सय सीसीदेखि दुई सय २५ सीसीसम्मका बाइक उपलब्ध छन् । त्यसमा एचएफ डिलक्स, स्प्लेन्डर एनएक्सजी, आई स्मार्ट ११०, आई ३एस, सुपर स्प्लेन्डर, ग्ल्यामर (डिस्क र ड्रममा) एचिभर १६९ आई३एस, एक्स्ट्रिम स्पोर्टलगायतका १४ मोडल छन्, जसको बजार मूल्य एक लाख ५५ हजार रुपैयाँबाट सुरु भएर दुई लाख ७५ हजार रुपैयाँसम्म रहेको छ । त्यस्तै स्कुटरतर्फ प्लेजर, मेस्ट्र एज, ड्युटलगायत छन् । यिनको बजारमूल्य एक लाख ६५ हजार रुपैयाँबाट सुरु भएर एक लाख ८१ हजार रुपैयाँसम्म रहेको नेपाल जनरल मार्केटिङ प्रालिका अध्यक्ष अभिक ज्योतिले जानकारी दिए । कम्पनीले नेपालभर ७५ वटा सेल्स पोइन्टमार्फत बिक्री तथा सर्भिस सेवा प्रदान गरिरहेको उनले बताए ।

हिट्को प्रालि

३४ वर्षदेखि हिट्को प्रालिले नेपालमा सञ्चालन भएका वर्कसपलाई आवश्यक सवारी बनाउने, सफा गर्ने तथा मर्मतका लागि आवश्यक औजार सप्लाई गर्दै आएको छ ।
नेपालमा सञ्चालित वर्कसपमध्ये ९० प्रतिशतमा आफैले सामान सप्लाई गरिरहेको कम्पनीका प्रमुख कार्यकारी अधिकृत (सीईओ) प्रदीपमान प्रधानको दाबी छ । कम्पनीले भारतीय बजारमा उत्पादित सामानको व्यापार गर्दै आएको छ । काठमाडौं उपत्यकामा फ्रि डेलिभरी सेवा पनि दिँदे आएको छ । उपत्यकाबाहिरका लागि भने जडानमा कुनै शुल्क नलिएको उनको भनाइ छ । प्रालिले सामान खरिद गर्ने वर्कसपलाई एक वर्षको वारेन्टी पनि दिँदै आएको छ । प्रधान नाडाका सहकोषअध्यक्ष पनि हुन् ।

हजुरलाई नमस्ते ट्रेडलिंक प्रालि

हजुरलाई नमस्ते ट्रेडलिंक प्रालिले १० वर्षदेखि लुब्रिकेन्स, टायर र हेभी इक्विपमेन्टका स्पेयर्स पार्ट्स बिक्री गर्दै आएको छ । कम्पनीले इटालियन ब्रान्डको आईटीआर लुब्रिकेन्ट्स बिक्री गर्छ । आईटीआर लुब्रिकेन्ट्सको आधिकारिक बिक्रेताका रूपमा ट्रेडलिंक प्रालिले काम गरेको भने दुई वर्ष भइसकेको छ । यसबाहेक पनि अमेरिकन ब्रान्डको विश्वकै नम्बर एकमा पर्ने जीपी लुब्रिकेन्ट्सको समेत बिक्री गर्दै आएको कम्पनीका सीईओ तथा नेपाल हेभी इक्विपमेन्ट व्यवसायी महासंघका अध्यक्ष ताराबहादुर कुँवरले दाबी गरे ।

गुणस्तरीय लुब्रिकेन्ट्स प्रयोग गरेको अवस्थामा सवारीसाधनको सुरक्षा र खर्च पनि कम लाग्ने उनको भनाइ छ । आफूहरूले बिक्री गर्ने लुब्रिकेन्ट्स प्रयोग गर्दा पाँच हजार किलोमिटरसम्म मोटरसाइकल चलाउन सकिने उनको दाबी छ । कम्पनीले न्यूनतम चार सय ३० देखि ७ सय रुपैयाँसम्मका लुब्रिकेन्ट्स बिक्री गर्दै आएको छ ।

बोल्ट लुब्रिकेन्ट्स

नेपाली बजारमा नयाँ उत्पादनका रूपमा एक वर्षदेखि बोल्ट लुब्रिकेन्ट्स प्रवेश भएको छ । भारतीय बजारमा उत्पादन हुने बोल्टका लागि आधिकारिक बिक्रेता लक्ष्मीपति कन्सर्न प्रालि हो । कम्पनीले सबै प्रकारका सवारीका लागि उपयुक्त लुब्रिकेन्ट्सको बिक्रीवितरण गर्दै आएको छ ।मोटरसाइकलमा प्रयोग हुने बोल्ट लुब्रिकेन्ट्सको मूल्य भने ६ सय १० रहेको छ ।

गल्फ लुब्रिकेन्ट्स

गल्फ नेपालमै उत्पादन हुने पुरानो लुब्रिकेन्ट्स हो । ३० वर्षदेखि नेपालमै उत्पादन भइरहेको गल्फ ब्रान्डका लुब्रिकेन्ट्स बजारमा उपलब्ध सबै प्रकारका सवारीलाई मिल्छ । कम्पनीका मार्केटिङ म्यानेजर प्रद्युम्न न्यौपानेले आफूहरू नेपालको एक नम्बर भएको दाबी गर्छ । मोटरसाइकलमा प्रयोग हुने लुब्रिकेन्ट्सको मूल्य चार सय ७० देखि पाँच सय ५० रुपैयाँमा उपलब्ध छ ।

म्याक लुब्रिकेन्ट्स

भारतमा उत्पादन हुने म्याक लुब्रिकेन्ट्सका लागि नेपालको आधिकारिक बिक्रेता सिप्रदी ट्रेडिङ प्रालि हो । कम्पनीले १५ वर्षदेखि नेपालमा चल्ने सबै प्रकारका सवारीमा प्रयोग हुने लुब्रिकेन्ट्स बिक्री गर्दै आएको छ । अटोमोबाइल्स लुब्रिकेन्टमा आफूहरू एक नम्बर रहेको प्रालिका ल्युब डिपार्टका उपमहानिर्देशक रोशनकुमार श्रेष्ठको दाबी छ ।

कम्पनीले सबैभन्दा बढी ठूला सवारीमा प्रयोग हुने लुब्रिकेन्ट्सको बिक्रीवितरण गर्दै आएको छ । कम्पनीले गतवर्ष मात्रै २३ लाख किलोलिटर लुब्रिकेन्ट्स बिक्री गर्न सफल भएको उनको दाबी छ । म्याक लुब्रिकेन्ट्स बजारमा प्रतिलिटर दुई सय ८० रुपैयाँदेखि नौ सय रुपैयाँसम्ममा उपलब्ध छ।

प्रस्तुति : उत्तम काप्री/रञ्जनहरि कोइराला