यी हुन् बढी व्यापार गर्ने पाँच नेपाली चलचित्र
काठमाडौं : चलचित्र ‘छक्का पञ्जा २’ अहिले आक्रामक व्यापारका साथ प्रदर्शन भइरहेको छ । दसैंअघि रिलिज भएको यो चलचित्रले सोमबारसम्ममा लगभग ११ करोड रुपैयाँको व्यापार गरिसकेको छ । यो आँकडाले छक्का पञ्जा २ नेपाली चलचित्रको इतिहासमा सर्वाधिक बढी व्यापार गर्ने दोस्रो चलचित्र बनिसकेको छ । दीपा श्री निरौला निर्देशित यस चलचित्रमा दीपकराज गिरी, केदार घिमिरे, जितु नेपाल, बुद्धि तामाङ, प्रियंका कार्की, स्वस्तिमा खड्कालगायतले अभिनय गरेका छन् ।
सबभन्दा धेरै व्यापार गर्ने चलचित्रमा ‘छक्का पञ्जा’ नम्बर वानमा छ । यो चलचित्रले नेपालमा १६ करोड रुपैयाँको व्यापार गरेको थियो । यो आँकडा चुम्न छक्का पञ्जा २ ले अझै पाँच करोड रुपैयाँको व्यापार गर्नुपर्छ । ‘मोफसलमा त छक्का पञ्जाको रेकर्डलाई छक्का पञ्जा २ ले उछिनिसकेको छ’, निर्माता एवं कलाकार दीपकराज गिरी भन्छन्, ‘दर्शकको फिडब्याक राम्रो छ । व्यापारमा छक्का पञ्जालाई नउछिने पनि छेउछाउ पुग्ने अवस्था देखिएको छ ।’ दीपा श्री निरौलाले निर्देशन गरेको यस चलचित्रमा दीपकराज गिरी, केदार घिमिरे, जितु नेपाल, प्रियंका कार्की, बुद्धि तामाङ लगायतकै अभिनय छ । छक्का पञ्जा र यसको सिक्वेलको व्यावसायिक सफलताले दीपा श्री निरौलालाई पनि सर्वाधिक सफल निर्देशकका रूपमा उभ्याएको छ ।
छक्का पञ्जाभन्दा अघि धेरै व्यापार गर्ने चलचित्र ‘कोहिनुर’ थियो । १० करोड रुपैयाँभन्दा बढीको व्यापार गरेको यो चलचित्र आकाश अधिकारीले निर्देशन गरेका हुन् । श्रीकृष्ण श्रेष्ठको लगानीमा बनेको उनी अभिनीत अन्तिम चलचित्र पनि हो । उनको दुःखद निधनपछि प्रदर्शनमा आएको यस चलचित्रमा श्रीकृष्णका साथमा श्वेता खड्काले स्क्रिन सेयर गरेकी थिइन् । त्यस बेला यो चलचित्रको व्यापारलाई ‘असामान्य’ मानिएको थियो । यो चलचित्रको व्यापारलाई उछिन्न वर्षौं लाग्ने तर्क गरिएका थिए । तर, अहिले यो चलचित्र तेस्रो स्थानमा झरीसकेको छ ।
पति श्रीकृष्ण श्रेष्ठको निधनपछि चलचित्र क्षेत्रबाट लामो समय टाढा रहेकी श्वेता खड्का आफ्नै लगानीमा चलचित्र ‘कान्छी’मार्फत कमब्याक गर्दैछिन् । यस चलचित्रमा उनलाई पर्दामा साथ दिएका छन् दयाहाङ राईले । आकाश अधिकारीको निर्देशनमा मुस्ताङमा छायांकन भइरहेको यो चलचित्र निर्माण घोषणादेखि नै चर्चामा छ । यसको मुख्य कारण हो, श्वेताको कमब्याक ।
बढी व्यापार गर्ने चलचित्रमा ‘लुट २’ तेस्रो नम्बरमा छ । निश्चल बस्नेत निर्देशित यो चलचित्रले आठ करोड रुपैयाँ माथिको व्यापार गरेको थियो । डेढ करोड रुपैयाँको लागतमा बनेको यो चलचित्रले प्रदर्शनअघि छक्का पञ्जाको रेकर्ड ब्रेक गर्ने आकलन गरिएको थियो । चलचित्रको टिजर र ‘ठमेल बजार’ बोलको गीतले युट्युबमा पाएको भिवर्सले त्यस्तो संकेत गरे पनि छक्का पञ्जालाई भेट्न सकेन । तापनि निर्मातालाई राम्रै मुनाफा दियो । यस चलचित्रमा दयाहाङ राई, सौगात मल्ल, कर्मा, सिर्जना सुब्बा, ऋचा शर्मालगायतले अभिनय गरेका थिए ।
सर्वाधिक कमाउने चलचित्रको पाँचौं नम्बरमा ‘लुट’ले स्थान सुरक्षित गरेको छ । ३० लाख रुपैयाँको लागतमा बनेको यो चलचित्रले चार करोड रुपैयाँमाथिको व्यापार गरेको थियो । यो चलचित्रले व्यापारमा जति सफलता हासिल गर्यो, नेपाली चलचित्रको निर्माण शैलीलाई पनि युटर्न गराइदियो । त्यसयता यो धारका चलचित्र निर्माणले जति तिव्रता पाएको छ व्यावसायीक रूपमा पनि त्यतिकै सफल भएका छन् ।
नरेन्द्र महर्जन र माधव वाग्लेको लगानीमा बनेको यस चलचित्रबाट दयाहाङ राई, सौगात मल्ल, कर्मा स्टार साबित भए । त्यसयता खासगरी दयाहाङ र सौगातले पछाडि फर्केर हेर्नु परेको छैन । चलचित्रमा दयाहाङ, सौगात, कर्माका साथै ऋचा शर्मा, सिर्जना बस्नेत लगायतले अभिनय गरेका थिए।
कुनै नेपाली चलचित्रले एक करोड रुपैयाँको व्यापार गर्यो भने निर्माताको हातमा ३५ देखि ४० लाख रुपैयाँसम्म पर्छ । कर (१३ प्रतिशत भ्याट र २ देखि पाँच प्रतिशत स्नाथीय कर) कटाएर बाँकी रकममा हलवाला र निर्माताले प्रायः ५०÷५० प्रतिशत हिस्सा लिन्छन् । निर्माताले आफ्नो हिस्साबाट वितरकलाई पाँचदेखि १५ प्रतिसतशम्म कमिसन दिन्छन् ।
प्रतिक्रिया दिनुहोस !
