चीनको पनि १० हजार किलोमिटर मार हान्ने अन्तरमहादेशीय मिसाइल
एजेन्सी : चीनले पनि स्वदेशमै डोङफेङ-३१ एजी इन्टरकन्टिनेन्टल ब्यालेस्टिक मिसाइल निर्माण गरेको छ । यो मिसाइलले १० हजार किलोमिटरसम्म प्रहार गर्न सक्छ । यसबाहेक मध्यम दूरीसम्म प्रहार गर्ने अर्को ब्यालेस्टिक मिसाइल डीएफ-२१डी पनि छ, जसलाई ‘क्यारियर किलर’ पनि भनिन्छ । डीएफ-२६ र डीएफ-१६जी पनि मध्यम दूरीका ब्यालेस्टिक मिसाइल हुन् ।
यसका साथै अर्को वर्ष चीनले लामो दूरीसम्म प्रहार गर्ने एउटा इन्टरकन्टिनेन्टल ब्यालेस्टिक मिसाइल सेनालाई हस्तान्तरण गर्ने बताइएको छ । यो मिसाइलले एकैपल्ट अनेको आणविक हतियार बोक्न सक्ने दाबी गरिएको छ । नयाँ डोङफेङ-४१ मिसाइलको गति म्याक १० भन्दा पनि धेरै हुने दाबी गरिएको छ । यसले शत्रु सेनाले प्रहार गरेको मिसाइलको चेतावनी दिनसक्ने र शत्रुको रक्षा प्रणाली छिचोलेर प्रहार गर्न सक्षम रहेको बताइएको छ ।
चीनले हाइपरसोनिक र्यामजेट इन्जिनयुक्त मिसाइलको सफल परीक्षण गरिसकेको दाबी चीनको एरोस्पेस साइन्स एन्ड टेक्नोलजी कर्पोरेसन (सीएएससी) ले यसै वर्ष जुनमा गरेको थियो । हाइपरसोनिक इन्जिनको गति ६ हजार २ सय किलोमिटर प्रतिघन्टा बढी हुन्छ । यो मिसाइलमा जडान हुने र्यामजेट इन्जिनमा ठोस इन्धन प्रयोग हुन्छ ।
र्यामजेट इन्जिनको उपयोगबाट मिसाइलको प्रहार क्षमता तीन गुणासम्म बढाउन सकिन्छ । सय किलोमिटर प्रहार क्षमताको कुनै मिसाइललाई र्यामजेट इन्जिनको सहायताले ३ सय २० किलोमिटरसम्म प्रहार क्षमता बढाउन सकिन्छ । तर चीनसँग अहिलेसम्म स्थल, जल र आकास तीनै ठाउँबाट प्रहार गर्नसक्ने ट्रायड मिसाइल छैन ।
पाकिस्तानी मिसाइल
पाकिस्तानले यसै वर्ष जनवरीमा बाबर-३ क्रुज मिसाइलको सफल परीक्षण गरेको थियो । पाकिस्तानी सेनाले क्रुज मिसाइल बाबर-३ लाई पनडुब्बीबाट प्रहार गर्न सफलता पाएको दाबी गरेको थियो ।
यसअघि पाकिस्तानसँग समुद्रबाट प्रहार गर्नसक्ने आणविक मिसाइल थिएन । बाबर-३ को प्रहार क्षमता ४ सय ५० किलोमिटर छ । पनडुब्बीबाट प्रहार गर्न सकिने मिसाइलबारे थाहा पाउन नसकिने भएकाले खतरनाक मानिन्छ ।
प्रतिक्रिया दिनुहोस !
