उत्तर कोरिया र क्युबाले सहकार्य गर्ने

हवाना : अमेरिकासँग राम्रो सम्बन्ध नभएका दुई देश उत्तर कोरिया र क्युबाले द्विपक्षीय सम्बन्धका साथै पछिल्लो समय विकसित अन्तर्राष्ट्रिय विविध परिस्थितिबारे आवश्यक छलफल गरेर सहकार्य गर्ने भएका छन् ।

औपचारिक भ्रमणमा रहेका उत्तर कोरियाली विदेशमन्त्री सोमबार क्युबाको राजधानी हवाना पुगेपछि भएको भेटवार्तामा दुई देशबीच यस्तो सहमति बनेको बताइएको छ । भेटवार्तापछि बिहीबार प्रकाशित संयुक्त विज्ञप्तिमा सहकार्यको प्रतिबद्धता व्यक्त गरिएको छ ।

उनको क्युबा भ्रमण यस्तो समयमा भएको छ, जतिबेला उत्तर कोरिया र क्युबासँग अमेरिकाको सम्बन्ध बिग्रिएको मात्र छैन, अमेरिकाले उत्तर कोरियाविरुद्ध थप प्रतिबन्ध लगाएको छ । क्युबाको भ्रमणमा रहेका उत्तर कोरियाली विदेशमन्त्री रि योङ हो र क्युबाली विदेशमन्त्रीको भेटवार्तापछि जारी संयुक्त विज्ञप्तिमा यी दुई देशले आपसमा मिलेर अघि बढ्ने सहमति जनाएका बताइएको छ ।

अमेरिकी राष्ट्रपति डोनल्ड ट्रम्प प्रशासनले उत्तर कोरियाविरुद्ध आर्थिक नाकाबन्दी लगाएको छ । यतिमात्र नभएर उत्तर कोरियाविरुद्ध अमेरिकाले सेना परिचालन गर्नसक्ने बताउँदै आएको छ । क्युबासँग पनि पछिल्लो समय अमेरिकाको सम्बन्ध बिग्रिएको छ । क्युबासँगको सम्बन्धका कारण अमेरिकाले गत महिना क्युबास्थित अमेरिकी दूतावासबाट आफ्ना आधा कर्मचारी फिर्ता बोलाएको थियो।

यस्तो स्थितिमा दुवै देशले एक भएर अघि बढ्ने सहमति गरेका हुन् । उनीहरूले कुनै पनि समस्याको समाधान गर्न दुई देशले समन्वय गरेर आपसी सहयोगका साथ अघि बढ्ने बताएका हुन् । सन् १९६० मा कूटनीतिक सम्बन्ध स्थापना भएदेखि नै क्युबा र उत्तर कोरियाले भने असल कूटनीतिक सम्बन्ध कायम गर्दै आएको पनि सञ्चारमाध्यमले उल्लेख गरेका छन् ।

उत्तर कोरियाले पछिल्लो समय निरन्तर गरिरहेको आणविक मिसाइल परीक्षणको विरोध गरिरहेको अमेरिकाविरुद्ध उत्तर कोरिया अत्यन्त कडा रूपमा प्रस्तुत हुने गरेको छ । क्युबासँग अमेरिकाको करिब पाँच दशकदेखि सम्बन्ध बिग्रिएको थियो । अमेरिकाका पूर्वराष्ट्रपति बाराक ओबामाको प्रयासले क्युबासँग फेरि कूटनीतिक सम्बन्ध स्थापना भएको थियो । तर ट्रम्प राष्ट्रपति भएपछि उनले क्युबासँग सुधारिएको सम्बन्धलाई निरन्तरता दिएनन् ।