पाकिस्तानी कलेजमा आतङ्कवादी आक्रमण, नौ जनाको मृत्यु
पाकिस्तानी शहर पेशावरस्थित एक कलेजमा प्रवेश गरी बन्दुकधारीहरुले अन्धाधुन्ध गोली चलाउँदा कम्तीमा नौ जनाको ज्यान गएको छ। मारिनेमध्ये ८ जना विद्यार्थी र एक जना कर्मचारी रहेको प्रहरीले बताएको छ। ३६ जना घाइते भएका छन्।
बुर्का लगाएका तीन पुरुष रिक्सामा पेशावरस्थित कृषि तालिम केन्द्र पुगेको र त्यहाँभित्र प्रवेश गरेको बताइएको छ। सेनाका अनुसार सबै आक्रमणकारी मारिएका छन्।
पाकिस्तानी तालिवानले आक्रमण आफूहरुले गराएको बताएको छ। इद ए मिलादको छुट्टीमा कलेज बन्द रहेको ठानिएको छ।
कलेजभित्रबाट कम्तीमा एउटा विस्फोटको आवाज सुनिएको सेनालाई उद्धृत गर्दै स्थानीय सञ्चारमाध्यमले जनाएका छन्।
प्रहरी र सेनाले उक्त क्षेत्रलाई घेराबन्दी गरेका छन्।
एक जना घाइते विद्यार्थीले रोयटर्सलाई बताएअनुसार, कलेजभित्रै बस्ने ४०० जना विद्यार्थीमध्ये करिब १२० जना आक्रमणको समयमा उपस्थित रहेको बताइएको छ।
प्रतिक्रिया दिनुहोस !
