क्षेप्यास्त्र ट्र्याकिङ अभ्यास शुरु

सोल : अमेरिका, दक्षिण कोरिया र जापानले कोरियाली समुद्रमा क्षेप्यास्त्र ट्र्याकिङ अभ्यास गरेका छन् । ती सैनिकले समुद्रमा गरिने ब्यालेस्टिक क्षेप्यास्त्रका विरुद्धमा गरिने प्रतिरक्षाका लागि तयारी गरेको बताएका छन् ।

यस अभ्यासबाट उत्तर कोरियाले प्रहार गर्ने क्षेप्यास्त्रका बारेमा जानकारी दिने स्पष्ट पारिएको छ । सोमबारबाट शुरु भएको उक्त अभ्यास तीन दिनसम्म सञ्चालन हुने बताइएको छ । त्रिपक्षीय रूपमा गरिएको यो अभ्यास खासगरी उत्तर कोरियाले पछिल्लो समयमा जारी राखेको आणविक परीक्षणका विरुद्धमा लक्षित रहेको दाबी गरिएको छ ।

त्यस अभ्यासका क्रममा कोरियाली प्रायद्वीपमा हुनसक्ने सम्भावित ब्यालेस्टिक क्षेप्यास्त्रको रोकावटका लागि कम्प्युटरका माध्यमबाट काम हुने संयन्त्रको पनि विकास गरिएको बताइएको छ । गत वर्षको जुनमा पनि यस्तो अभ्यास गरिएको बताइएको छ । उक्त अभ्यासमा तीनवटै देशका एक एकवटा युद्धपोत समावेश गरिएको छ ।

हालैमात्र पनि उत्तर कोरियाविरुद्ध दक्षिण कोरिया र अमेरिकाले अहिलेसम्मकै सबैभन्दा ठूलो सैन्य अभ्यास गरेका थिए । उक्त सैन्य अभ्यासको उत्तर कोरियाले विरोध गरेको थियो । पछिल्लो समयमा जापान, दक्षिण कोरिया र अमेरिकासँग पनि उत्तर कोरियाको सम्बन्ध बिग्रिएको छ । उत्तर कोरियाले गर्ने गरेका क्षेप्यास्त्र परीक्षणमा उत्तर कोरियाले दक्षिण कोरिया र अमेरिकालाई लक्षित गरेको आरोप लगाउँदै आएका छन् ।

उत्तर कोरियाले जारी राखेको आणविक कार्यक्रमका कारण यस्तो अवस्था आएको हो । दुई साता पहिले गरिएको अन्तरमहाद्वीपीय क्षेप्यास्त्रको सफल परीक्षणपछि उत्तर कोरियाले आफूलाई परमाणु शक्ति सम्पन्न देश भएको दाबी गरेको छ । जसले गर्दा अमेरिका र उत्तर कोरियाले एक अर्काका विरुद्धमा निकै कडा अभिव्यक्ति दिँदै आएका छन् । अमेरिकी राष्ट्रपति डोनाल्ड ट्रम्पको केही समयमात्र अघि भएको दक्षिण कोरिया, जापान र चीनको भ्रमणका समयमा पनि राष्ट्रपति टम्पले उत्तर कोरियाको निकै आलोचना गरेका थिए ।