अरुण तेस्रोका म्यानेजरको पौडी खेल्दा डुबेर मृत्यु
खाँदबारी : अरुण तेस्रो जलविद्युत परियोजना सङ्खुवासभामा कार्यरत सिनियर म्यानेजरको पौडी खेल्ने क्रममा खोलामा डुबेर मृत्यु भएको छ । भारतको हिमाञ्चल प्रदेशका ३५ वर्षीय गौरब नेगी गुरुङको खाँदबारी–९ सभाखोलामा पौडी खेल्ने क्रममा शनिबार मृत्यु भएको जिल्ला प्रहरी कार्यालयले जनाएको छ ।
खाँदबारी–९ मा रहेको परियोजना भवन उद्घाटनका क्रममा लगाइएको पुजा पछि गुरुङ फूलपाती सेलाउन खोलामा गएका थिए । उनी पौडी खेल्ने क्रममा डुबेपछि तत्काल उद्धार गरी उपचारका लागि मनकामना अस्पताल तुम्लिङटार लगिएको प्रहरी निरीक्षक वेदप्रसाद गौतमले बताए ।
घटनास्थल सदरमुकाम खाँदबारीबाट १८ किलोमिटर दक्षिणमा पर्छ ।