सेनाको परीक्षामा १२ नक्कली परीक्षार्थी पक्राउ
काठमाडौं : नेपाली सेनाको सैन्य पदको लिखित परीक्षामा अर्काको नाममा परीक्षा दिन पुगेका चार महिलासहित १२ नक्कली परीक्षार्थी पक्राउ परेका छन् ।
लोकसेवा आयोगद्वारा लिइएको सैन्य पदको लिखित परीक्षामा अर्काको नामबाट परीक्षा दिने रत्नराज्य माध्यमिक केन्द्रबाट एक र सिआइटिई कलेज तीनकुनेबाट ११ गरी कुल १२ नक्कली परीक्षार्थीलाई शनिबार पक्राउ गरिएको महानगरीय प्रहरी परिसरले जनाएकोे छ ।
पक्राउ पर्ने महिला नक्कली परीक्षार्थीमा काठमाडौं मनमैजुकी कविता श्रेष्ठ, कैलालीकी जानकी माझी, मनिषा विष्ट र दोलखाकी सम्झना मगर रहेका छन् ।
यसैगरी भोजपुरका गोपाल ढकाल, बर्दियाका प्रकाश भण्डारी र गौतम राना, कैैलालीका समिप रोकाय, कास्कीका लोचन वाग्ले, गुल्मीका मोहित भण्डारी, दोलखाका सुदीप कार्की र दिवस कार्कीलाई नक्कली परीक्षार्थीका रुपमा परीक्षामा सामेल रहेकै अवस्थामा नियन्त्रणमा लिइएको प्रहरी वृत्त नयाँ बानेश्वरले जनाएको छ ।
पक्राउ पर्नेमा अधिकांश आफन्तको परीक्षा दिन गएका भेटिएको छ भने केही भने पैसा लिएर जाँच दिएको प्रहरीको प्रारम्भिक अनुसन्धानबाट खुलेको छ ।
प्रहरी वृत्त नयाँ बानेश्वरका प्रमुख एवं प्रहरी नायव उपरीक्षक रवि पौडेलले नक्कली परीक्षार्थीको अभियोगमा पक्राउ परेकालाई कानून अनुसार कारवाही चलाइने बताए ।
केही विद्यार्थीले आफूलाई गाडीमा राखेर परीक्षा दिन पठाएको भनी बयान दिएपछि नक्कली परीक्षार्थीको संलग्नताबारे थप अनुसन्धान भइरहेको प्रहरीको भनाइ छ ।
लोकसेवाले परीक्षा सञ्चालन गर्ने भएकाले नक्कली परीक्षार्थीको संलग्नताको सूचना प्राप्त भए पनि त्यसबारे अरु कुराको जानकारी नभएको बताइएको छ । रासस