काठमाडौँ: फोटो पत्रकारहरुको छाता संगठन पिजे क्लब, नेपालको नवौँ साधारणसभाबाट अन्नपूर्णकर्मी विकास कार्की पुन: अध्यक्षमा निर्वाचित भएका छन् ।
शनिबार भएको सम्पन्न साधारणसभाले आगामी दुई वर्षका लागि अन्नपूर्ण पोष्टका फोटो सम्पादक विकास कार्कीलाई अध्यक्षमा निर्वाचित गरेको हो ।
कार्कीको अध्यक्षतामा चयन ११ सदस्यीय नयाँ कार्यसमितिको उपाध्यक्षमा नेपाल रिपब्लिक मिडियाका केशबराज थोकर, महासचिवमा कान्तिपुर पब्लिकेशनका श्रुति श्रेष्ठ र कोषाध्यक्षमा राजधानी दैनिकका द्वारिका काफ्ले र सचिवमा नयाँ प्रत्रिकाका ज्ञानेन्द्र कार्की निर्विरोध निर्वाचित भएका छन् ।
यसैगरी ६ सदस्यहरुमा नयाँ प्रत्रिका अमूल थापा, द काठमाडौँ पोष्टका प्रकाश तिमलसेना, नेपाली टाइम्सका बिक्रम राई, गोरखापत्रका बिकास द्वारे, कान्तिपुरका हेमन्त श्रेष्ठ र स्पोर्टस टाइम्सका शंकर ब्यनजनकार निर्बिरोध चयन भएका छन् ।
निर्वाचित पदाधिकारीहरुलाई शनिबारै एक समारोहबीच निर्वाचन समितिका संयोजक अधिबक्ता पबित्रा राउत र नेपाल पत्रकार महासंघका प्रतिनिधि तथा एशोसियट संयोजक पवन आचायले प्रमाणपत्र प्रदान गरे ।
नेपाल पत्रकार महासंघको महासचिब रमेश बिष्टको प्रमुख अतिथ्यमा सम्पन्न अधिवेशनमा वरिष्ठ फोटो पत्रकार विकास रौनियार, नरेन्द्र श्रेष्ठ किरण पाण्डे र निवर्तमान अध्यक्ष प्रकास माथेमा पनि उपस्थित थिए ।
विष्टले फोटो पत्रकारिताको महत्व झन् बढ्दै गएको बताउँदै तस्बिरको भाषा सशक्त हुने भएकाले फोटो पत्रकारहरुका समस्याबारे महासंघ संवेदनशिल रहेको उल्लेख गरे।
फोटो पत्रकारहरुको न्यूनतम पारिश्रमिक र उनीहरुका क्यामेराको बीमाबारे क्लबसँग सहकार्य गर्ने विष्टले बताए। यसैगरी क्लबले निवर्तमान कार्यसमितिका सवै पदाधिकारी तथा सदस्यलाई क्लबलाई दिएको योगदानका लागि धन्यवाद प्रस्ताव पास गरेको छ।
प्रतिक्रिया दिनुहोस !
