चरो ठोकिएको सौर्यको जहाज काठमाडौं पुग्यो

धनगढी :  कैलालीको आकाशमा चरो ठोक्किएर करिब ६ घण्टा धनगढी विमानस्थलमा रोकिएको सौर्य एयरलायन्सको जहाजमा काठमाडौंका लागि गएको छ । काठमाडौंबाट प्राविधिक टोली आएर जाँचेपछि  काठमाडौंका लागि उडेको सौर्य एयरलायन्सका धनगढी स्टेशन इञ्चार्ज नवदित केसीले जानकारी दिए ।

चरो  ठोकिएपछि  बिहान साढे ११ बजेबाट धनगढी विमानस्थलमा ग्राउन्डेड भएको जहाज बेलुकी ५ः४० मा उडेको हो । प्राविधिक टोलीले कुनै खराबी नरहेको बताएपछि जहाज  उडेको उनले बताए । 

दिउँसोदेखि कुरिरहेका ५० जना यात्रु बोकेर जहाज काठमाडौंका लागि उडेको इन्चार्ज केसीले जानकारी दिए । शुक्रबार बिहान काठमाडौंबाट ११ बजेर ४० मिनेटमा ११ जना बालकसहित ५४ जना यात्रु बोकेर धनगढीका लागि उडेको सौर्यको जहाजमा धनगढी विमानस्थलदेखि २५ किलोमिटर टाढाको आकाशमा चरो ठोकिएको थियो ।  

धनगढी विमानस्थलका एयर ट्राफिक कन्ट्रोलर रवि यादवका अनुसार  करिब साढे ६ हजार फिटको उचाईमा रहेका बेला  जहाजको नोज (अगाडिको चुच्चो भाग) मा चरो  ठोकिएको थियो । कैलालीमा पर्ने घोडाघोडी नगरपालिकाको आकाशमा चरा ठोकिएको अनुमान  गरिएको छ ।