बेंसीसहर : राष्ट्रिय गौरवको पुष्पलाल मध्यपहाडी लोकमार्गअन्तर्गत लमजुङमा पर्ने चेपेनदी–पाउँदी खण्डमा कालोपत्रे गरिने भएको छ । पाउँदी–ठाँटीपोखरी १६ किलोमिटर सडकखण्ड कालोपत्रे गर्न ग्राभेल गरी बेस हाल्ने काम भइरहेको छ । उक्त सडकको लमजुङतर्फ साढे ९ र गोरखातर्फ साढे ६ किमि पर्छ । सडकको ७ मिटर चौडाइ कालोपत्रे गरिने भएको छ।
ग्राभेलसँगै बेस हाल्ने र कालोपत्रे गर्ने योजना रहेको सडक विभागका इन्जिनियर सन्तोष थापाले जानकारी दिए । ‘बेस बस्न थालेपछि १ साताभित्रै पिच गर्छौं’, उनले भने, ‘मौसमले साथ दिए धमाधम काम हुन्छ।’ लमजुङमा ३ वर्षयता उक्त सडकमा काम भइरहेको छ । अर्को वर्षको चैतसम्म पाउँदी–ठाँटीपोखरी खण्डमा कालोपत्रे गरिसक्ने योजना रहेको थापाले जानकारी दिए। यसका लागि ३५ करोड रुपैयाँमा ठेकेदारसँग सम्झौता भएको छ।
बज्रगुरु–द कञ्चनजंघा–शंकरमाली जेभीले १६ किमिमा काम गरिरहेको छ । निर्माण कम्पनीका प्रतिनिधि सबइन्जिनियर नेत्र श्रेष्ठका अनुसार दैनिक सयदेखि डेढ सय जना कामदार सडक निर्माणमा खटिएका छन् । उनका अनुसार ‘ग्रेड कटिङ’ गर्ने, सडकलाई फराकिलो बनाउने, टेवा पर्खाल लगाउने, स्ल्याब, कल्भर्ट र पाइप कल्भर्ट राख्ने काम सकिएको छ । पुलका लागि छुट्टै टेन्डर छ । ‘अब बाँकी भाग ग्राभेल गर्ने, बेस हालेर पिच गर्ने हो । हामी तोकिएको समयमा काम सक्छौं’, उनले भने ।
लमजुङमा मात्रै ४ खण्ड गरेर मध्यपहाडी लोकमार्गको निर्माण थालिएको छ । मध्यपहाडी लोकमार्ग आयोजना प्रमुख सूर्यबहादुर रानाभाटले पाँचथरको चियो भन्ज्याङदेखि बैतडीको झुलाघाटसम्मको करिब १ हजार ७ सय ८७ किमिमध्ये लमजुङमा ४५ किलोमिटर पर्छ। धमिलिकुवाको चेपे नदीदेखि रामबजारको मादी नदीसम्मको ४५ किमिमा पाउँदी–किरिचे ८ किलोमिटर, भोर्लेटार खण्डको १ किलोमिटर, दैलेखमा १ किलोमिटरमा विवाद रहेको आयोजना प्रमुख रानाभाटले बताए।
प्रतिक्रिया दिनुहोस !
