स्थानीयले खने वातावरणमैत्री सडक
बैतडी : बैतडीका धेरैजसो ठाउँमा सडक निर्माणका लागि जेसीबी र एस्काभेटर सञ्चालन भइरहेका छन् । जेसीबी र एस्काभेटरले गाउँगाउँमा सडक निर्माण गरिरहेका बेला मेलौली नगरपालिकाको स्वाखान–थ्वाँ–गाउँकोट सडक भने स्थानीयले नै हाते औजारले खनिरहेका छन् ।
मेसिनका कारण स्थानीयले रोजगारी नपाएपछि कतिपय भारत गए पनि मेलौली नगरपालिका–७ का महिला र पुरुष सडक निर्माणमा जुटेका हुन् । ग्रामीण सामुदायिक पूर्वाधार कार्यक्रमअन्तर्गत उनीहरू सडक निर्माणमा जुटेका हुन् । डेढ किलोमिटर सडक निर्माणका लागि दैनिक डेढ सय मजदुर संलग्न हुने गरेको ग्रामीण सामुदायिक पूर्वाधार कार्यक्रमका ओभर्सियर हरीश लुहारले बताए । ‘हामीले कामका लागि नगद कार्यक्रमअन्तर्गत स्थानीयकै सहयोगमा सडक निर्माण गरिरहेका छौं । यसले गाउँलेलाई रोजगारी पनि मिलेको छ । सडक निर्माण पनि भइरहेको छ । मेसिनले जस्तो वातावरणमा प्रभाव पार्ने भन्ने पनि हुँदैन ।’
गाउँको सडक निर्माणमा सहभागी हुन पाएपछि स्थानीय पनि निकै खुसी छन् । ‘अन्य ठाउँमा मेसिनमार्फत काम भइरहे पनि गाउँमा हामी आफैं सडक निर्माणमा जुटेका छौं । हामीलाई रोजगारी पनि मिलेको छ । घरपरिवार चलाउन गाउँमै रोजगार पाएका छौं’, मेलौली–७ का मदनराज भाटले भने, ‘गाउँमा हुने विकास निर्माणमा यसरी नै स्थानीयको सहभागिता भयो भने रोजगारी पनि हुन्छ । काम पनि दिगो हुन्छ ।’
ग्रामीण सामुदायिक पूर्वाधार कार्यक्रमअन्तर्गत स्थानीय नै सडक निर्माणमा जुटेका हुन् ।
स्वाखान–थ्वाँ–गाउँकोट सडक निर्माणमा महिला पनि काममा खटिएका छन् । ‘हामी पनि पुरुषसँगै सडक खन्न व्यस्त छौं । उनीहरूले गर्ने काम हामीले पनि गरिरहेका छौं । गाउँमै केही पैसा कमाउन पाएका छौं’, मेलौली नगरपालिका–७ की रमिला भाटले भनिन् ।
गाउँको सडकमा काम गर्न पाएपछि मेलौली–७ की जसु भाट पनि खुसी छिन् । ‘धेरै ठाउँमा मेसिनले काम गर्छन्’, उनले भनिन्, ‘मेसिनले नै विकासको पैसा खाइदिन्छ । तर हाम्रो गाउँमा सडक निर्माणका लागि स्थानीय जुटेका छौं । हामीलाई रोजगारी पनि मिलेको छ ।’
ग्रामीण सामुदायिक पूर्वाधार कार्यक्रमले स्थानीयलाई रोजगारी दिने किसिमले काम गरिरहेको ओभरसियर लुहारले बताए । ‘त्यसैअन्तर्गत हामीले स्थानीय नागरिक परिचालन गरेर सडक बनाइरहेका हौं’, उनले भने ।