लमजुङका तीन ठाउँमा शंकास्पद वस्तु : जीएमआरको कार्यालयमा प्रेसर कुकर बम

बेसीशहर : लमजुङका तीन ठाउँमा विष्फोटक पदार्थ जस्तो देखिने शंकास्पद वस्तु फेला परेको छ । जिल्लाको सुन्दरबजार नगरपालिका–७ पाउँदीबजार, मध्यनेपाल नगरपालिका–४ दुईपिप्ले र मस्र्याङ्दी गाउँपालिका–४ ताघ्रिङ रामबजारमा शंकास्पद वस्तु फेला परेको हो ।

शनिबार बिहानै बम जस्तो देखिने शंकास्पद बस्तु भेटिएपछि स्थानीय त्रसित बनेका छन् । दमौली–भोर्लेटार सडकमा पर्ने दुइपिप्ले गेटनजिकै र बेसीसहर–डुम्रे सडकको लमजुङ प्रवेशद्वार पाउँदी गेटमा भेटिएका विष्फोटक पदार्थलाई नेपाली सेनाको डिस्पोजल टोलीले निस्कृय बनाएको छ । प्रमुख जिल्ला अधिकारी झंकनाथ ढकालले पाउँदी र दुईपिप्लेमा भेटिएका शंकास्पद वस्तुको श्रीजंग गणको डिस्पोजल टोलीले निस्कृय बनाएकोे बताए ।

मस्र्याङ्दी गाउँपालिका–४ ताघ्रिङको रामबजारस्थित माथिल्लो मस्र्याङ्दी–२ को साइड कार्यालयमा राखिएको विष्फोटक पदार्थको भने डिस्पोज भएको छैन् । भारतीय कम्पनी जीएमआरले निर्माण गर्ने भनिएको ६ सय मेगावाट क्षमताको माथिल्लो मस्र्याङ्दी–२ को साइड कार्यालयमा शनिबार बिहान प्रेसरकुकरलाई बेरिएर राखेको अवस्थामा शंकास्पद वस्तु फेला परेको हो ।

कार्यालयको कोठासँगै टाँसिने गरी उक्त वस्तु राखिएको छ । कार्यालयका सामाजिक विकास कार्यक्रम संयोजक राजन गुरुङका अनुसार बिहान १० बजेतिरमात्रै उक्त वस्तु देखिएको हो । 

प्रजिअ ढकालले जीएमआर कम्पनीको साइड कार्यालयमा राखिएको प्रेसरकुकर बमजस्तो देखिने वस्तु हटाउन सुरक्षाकर्मी खटाइसकेको बताए । खुदी र बाहुनडाँडाबाट प्रहरी साथै बाहुनडाँडा क्षेत्रमा निर्माण भइरहेको ङ्यादी हाइड्रोपावरको सुरुङ निर्माणका लागि विष्फोटक पदार्थ पड्काउँदै आएका सैनिक घटनास्थल पुगेको छ । श्रीजंग गणबाट डिस्पोजल टोली पुगेपछि मात्र सो वस्तु निस्किृय पारिने प्रजिअ ढकालले बताए ।

सो आयोजना नेत्र विक्रम चन्द (विप्लव) नेतृत्वको समूहले २०७१ माघ १८ गते आयोजना निर्माण गर्न नदिने भन्दै कार्यालयमा झण्डा गाडेका थिए । यसअघि विभाजन नहुँदैको नेकपा माओवादी, विभाजनपछि मोहन बैद्य नेतृत्वको माओवादी, त्यसपछि विप्लव नेतृत्वको नेकपाले सो आयोजनामा अबरोध पुर्‍याउँदै आएको छ । 

भारतीय कम्पनी जीएमआर इनर्जी प्रालिको ८२ प्रतिशत र नेपालको हिमताल हाइड्रोपावर कम्पनीको १८ प्रतिशत लगानीमा निर्माण हुने भनिएको यो आयोजनाको डीपीआर हुँदैछ ।