इटहरी : इटहरीकी मिठु कार्की ६ वर्षदेखि पालेको भैंसी डोर्याउँदै शनिबार बिहान इटहरी –२ को हवाई चोक पुगिन् । त्यहाँ उनको जस्तै अरु भैसीहरु पनि बिहानैदेखि ल्याएर राखिएका थिए ।
मिठूले भैंसीलाई नुहाएर चिटिक्क बनाएर ल्याएकी थिइन् । त्यहाँ ल्याइएका ३८ वटै भैंसी सिंगारिएका थिए । किनकी ती भैंसीहरु प्रतियोगितामा सहभागी थिए । प्रतियोगिता थियो, ‘ भैंसी सुन्दरी प्रतियोगिता ।’
सधै मानिसको सुन्दरी प्रतियोगिता हुने गरेकोमा भैंसी सुन्दरी प्रतियोगिता पहिलो पटक देखेको सर्वसाधारणले प्रतिक्रिया दिए ।जिल्ला पशु सेवा कार्यालय, भैसी अनुसन्धान केन्द्रबाट पशु डाक्टर र प्राविधिकहरु निर्णायकको रुपमा उपस्थित थिए भने विजेता भैसीहरुलाई नगद पुरस्कार समेतको व्यवस्था थियो ।
मिठूको भैसी ‘हिरा’ ले प्रथम हुँदै ११ हजार रुपैया पुरस्कार जितिन् । अरु भैसीभन्दा हिराको जिउडाल, अनुहार, दुधको फाँचो सबै उत्कृष्ठ ठहर भयो । जितपछि सबैले मिठू र उनका श्रीमान भरतलाई बधाई दिए । ‘मेरो भैसी र मलाई पनि बधाई छ,’ उनीहरुले आफ्नो भैसी र आफैलाई बधाई दिए ।
प्रतियोगितामा सहभागी भैसीको सुन्दरता मापन गर्न विभिन्न मापदण्ड तयार पारिएको थियो । खासगरी मुर्रा जातको भैसीलाई प्राथमिकता दिएको उनले बताइन्। त्यसमा पनि उत्कृष्ठ हुनको लागि भैसीमा धेरै गुणबारे विचार गरियो ।
‘भैसीको उचाइ, हिडाइ, फाँचो, दिने दुधको परिणाम, आदि कुरामा विचार गरियो,’ प्रतियोगिताका निर्णायक राष्ट्रिय भैसी अनुसन्धान केन्द्र तरहराका वरिष्ठ वैज्ञानिक पवनकुमार झाले भने, ‘भैसीको सुन्दरतादेखि स्वास्थ्य र दिने दुधको परिणामसमेत जाँचेर अंक दियौं ।’
राजदेवी टोलमा बसेको उनको परिवारले १० वर्षदेखि भैसी पालन गरिरहेको छ । भैसी स्याहार गर्ने काम मिठूले गर्छिन् । भैसीले दिनको १२ लिटर दुध दिन्छ । ‘दुध बेच्छौं र पाएको पैसाले घर खर्च चलाउँछौं,’ श्रीमान भरतले भने ।भरतले आफ्नो भैसीले जितेर पाएको रकम भैसीकै घाँस, खोलेको लागि प्रयोग गर्ने बताए ।
मिठूको भैसीले ७६.६६ अंक प्राप्त गर्यो । दोस्रो स्थान प्राप्त गर्ने नरबहादुर कार्कीको भैसीले ७६.६० अंक पायो भने तेस्रो स्थान प्राप्त गर्ने वेदनीधि दाहालको भैसीले ७५ अंक पायो । दोस्रो, तेस्रो, चौथो हुने भैसीले पनि पुरस्कार पाए ।
भैसीपालक किसानहरुलाई प्रोत्साहित गर्न प्रतियोगिता आयोजना गरिएको आयोजक संस्थाका अध्यक्ष टंक दाहालले जानकारी दिए । उनका अनुसार पछिल्लो समय भैसीभन्दा सजिलो हुने हुँदा गाई पाल्ने किसान बढेको र त्यसले दुग्ध उत्पादन कम हुने भन्दै भैसी पालनलाई प्रोत्साहित गर्न कार्यक्रम गरिएको उनले बताए ।
प्रतिक्रिया दिनुहोस !
