नयाँदिल्ली : भारतका पूर्वराष्ट्रपति प्रणव मुखर्जीले राष्ट्रिय स्वयंसेवक संघको कार्यक्रममा प्रमुख अतिथि बन्ने निम्ता स्वीकार गरेपछि कांग्रेसआईले विरोध गरेको छ ।कांग्रेस नेता सन्दीप दीक्षितले पूर्वराष्ट्रपति प्रणव मुखर्जी साम्प्रदायिक र हिंसावादी संगठन राष्ट्रिय स्वयंसेवक संघको कार्यक्रममा जान नहुने बताएका छन् ।
उनले स्वयंसेवक संघ जस्तो राष्ट्रविरोधी कुनै पनि नभएको बताएका छन् । उक्त संघलाई भारतमा रहन पनि दिन नहुने उनको भनाइ छ । दीक्षितले भने, ‘स्वयंसेवक संघ जस्तो विषालु सर्प आरएसएसको कार्यक्रममा मुखर्जी सहभागी हुनु अचम्म हो । के उनले विचार परिवर्तन गरेका हुन् ? ’ लामो समयसम्म कांग्रेसआई पार्टीको नेता रहेका पूर्वराष्ट्रपति मुखर्जीले ७ जुनमा नागपुरमा आयोजित संघको भावी ‘प्रचारक’लाई राष्ट्रवादको प्रवचन दिनेछन् । उनले नागपुरमा स्वयंसेवक संघका कार्यकर्तालाई सम्बोधन पनि गर्नेछन् ।
संघको शैक्षिक पाठ्यक्रमको तृतीय शिक्षा समूह उत्तीर्ण गरेका कार्यकर्तालाई उनले सम्बोधन गर्नेछन् । त्यस्ता कार्यकर्ता आजीवन राष्ट्रवादको प्रचारमा खटिने गर्छन् । संघका प्रमुख मोहन भागवतले मुखर्जीलाई राष्ट्रपति हुँदा पनि सम्बोधनका लागि निम्ता दिएका थिए । राष्ट्रपति पदमा रहन्जेल त्यस्ता कार्यक्रममा आफू उपस्थित नहुने उनले बताएका थिए । राष्ट्रपतिको कार्यकाल पूरा गरेपछि मुखर्जीको कांग्रेसआईसँग राजनीतिक सम्बन्ध हुने भएन ।
मुखर्जी राष्ट्रवादका विषयमा छलफल गर्न रुचि राख्छन् । संघले सांस्कृतिक राष्ट्रवादमा जोड दिँदै आएको छ । वर्षौंदेखि स्वयंसेवक संघले प्रस्तुत गर्दै आएको राष्ट्रवाद कांग्रेसआईलाई टाउको दुखाइ बन्दै आएको छ । महात्मा गान्धीको हत्यापछि कांग्रेसआई सरकारले स्वयंसेवक संघलाई प्रतिबन्ध लगाएको थियो । आफूलाई राजनीतिक रूपमा सिध्याउन खोजेपछि संघले जनसंघ भन्ने मोर्चा बनाएको थियो । त्यही जनसंघका नेताले पछि भारतीय जनता पार्टी बनाएका थिए ।
त्यसै विषयलाई जोडेर कांग्रेसआई र उसबाट फुटेका भारतीय कम्युनिस्ट पार्टी लगायले संघलाई राष्ट्रघाती भएको आरोप लगाउने गरेका छन् । यसैगरी समाजवादी पार्टीका नेता अखिलेश यादवले संघको विचारधाराबाट देशलाई जोगाउनुपर्ने बताएका छन् । भाजपाका वरिष्ठ नेता एवं केन्द्रीय मन्त्री नीतीन गडकरीले संघ कुनै पाकिस्तानी संगठन नभएको बताएका छन् । संघको कार्यक्रममा पूर्वराष्ट्रपतिले सम्बोधन गर्ने विषयलाई कांग्रेसआईले अनावश्यक टिप्पणी गरेको उनले बताएका छन् ।
प्रतिक्रिया दिनुहोस !
