बिर्तामोड : झापा, मोरङ र सुनसरीमा भएको छुट्टाछुट्टै सवारी दुर्घटनामा परी सात जना घाइते भएका छन्। आइतबार साँझ झापाको बिर्तामोडमा को २१ प ७२०६ र मे ७ प १७५१ नम्बरको मोटरसाइकल एक आपसमा ठोक्किदा कमल गाउँपालिका ७ का ४२ वर्षीय शेखरनाथ सेढाइ घाइते भएका हुन्। घाइतेको विएण्डसी अस्पतालमा उपचार भइरहेको छ। दुर्घटनामा संलग्न अर्का मोटरसाइकल चालक फरार रहेकाले खोजीकार्य जारी रहेको प्रहरीले जनाएको छ।
यस्तै सुनसरीको कोशी गाउँपालिका ७ पूर्व पश्चिम राजमार्गमा को २ च ८४३ नम्बरको कार दुर्घटना हुँदा चालक घाइते भएका छन्। पूर्वतर्फ आउँदै गरेको सो कार अनियन्त्रित भई सडकबाट करिब ५० मिटर तल खोल्सामा खस्दा मोरङ विराटनगर ३ का चालक अर्जुन बस्नेत घाइते भएका हुन्। उनको स्थानिय अस्पतालमा उपचार भइरहेको छ।
उता मोरङको ग्रामथान गाउँपालिकामा दुई वटा मोटरसाइकल ठोक्किदा चार जना घाइते भएका छन्। मे ४ प ७३६२ र को ३३ प ८५१० नम्बरको मोटरसाइकल राति ९ बजे ग्रामथान गाउँपालिका २ पिडारबनीमा एक अर्कासँग ठोक्किएको थियो।
घाइते हुनेमा मोरङ कानेपोखरी ७ का ३० वर्षीय धन बहादुर श्रेष्ठ, सोही ठाउँका ३० वर्षीय सुनिल श्रेष्ठ, ग्रामथान २ का १८ वर्षीय सुजन सरदार र सोही उमेरका धर्मेन्द्र माझी रहेका छन्। घाइतेहरुको नोबेल अस्पताल विराटनगर र स्थानीय अस्पतालमा उपचार भइरहेको छ।
त्यसैगरी मोरङ विराटनगर ४ स्थित एर्पोट सेकुवा कर्नर अगाडि साँझ ८ बजे को ३१ प ८६४१ नम्बरको मोटरसाइकलले ठक्कर दिएर एक पैदलयात्री घाइते भएका छन्। पहिचान नखुलेका अन्दाजी ६०÷६५ वर्षीय पैदलयात्री घाइते भएका हुन्। उनको नोबेल अस्पताल विराटनगरमा उपचार भइरहेको छ भने ठक्कर दिने मोटरसाइकलका चालक प्रहरीको नियन्त्रणमा रहेका छन्।
प्रतिक्रिया दिनुहोस !
