दमासकस : अमेरिकी नेतृत्वको हवाई सेनाले सिरियाको उत्तरतर्फ पर्ने हासाक शहरमा मंगलबार हवाई आक्रमण गरेको छ । त्यस आक्रमणमा केही सर्वसाधारण तथा विद्रोहीको पनि मृत्यु भएको छ ।
युद्धक विमानबाट उक्त शहरको आवास क्षेत्रलाई लक्षितगरी मध्याह्नमा हवाई आक्रमण शुरु भएको हो । सिरियाली सरकारी समाचार संस्था सानाले पनि उक्त खबरको पुष्टि गरेको छ । हासाकमै आइतबार राति पनि सैनिक कारबाहीबाटै केही बालबालिकाको मृत्यु भएको थियो ।
अमेरिकी गठबन्धन सेनाले आवास क्षेत्रमा लक्षित गरेर हवाई आक्रमण गर्ने गरेको छ । त्यसका विरुद्ध विगतमा पनि विरोध हुने गरेको थियो । तैपनि हवाई आक्रमण निरन्तर रहेको सानाले उल्लेख गरेको छ । सिरियाको विदेश मन्त्रालयले अमेरिकी नेतृत्वको गठबन्धनलाई यहाँबाट हटाउन संयुक्त राष्ट्रसंघमार्फत आग्रह गर्दै आएको छ । सिरियामा सन् २०१४ देखि अमेरिकी नेतृत्वको गठबन्धनले कारबाही शुरु गरेको थियो । अमेरिकी सेनाको नेतृत्वमा थप केही देशका सैनिकले यहाँ कारबाही गर्ने गरेका छन् ।
सिरियामा विगत लामो समयदेखि जारी रहेको हिंसामा तीन लाखभन्दा बढी मानिसको ज्यान गएको छ । आक्रमणमा लाखौँ नागरिक घाइते भएका छन् भने ठूलो संख्याका सिरियाली देश छोडेर भाग्न बाध्य छन् ।
सरकार समर्थक ४५ र आइएसका २६ लडाकुको मृत्यु
बेरुत : सिरियाली पूर्वी क्षेत्रमा इस्लामिक स्टेट (आइएस) लडाकु र सरकार पक्षधर लडाकु समूहबीच भएको झडपमा ४५ जना सरकार समर्थक लडाकुको मृत्यु भएको सिरियाली मानवअधिकार अनुगमन समूहले मंगलबार जानकारी गराएको छ । आइएस समूहले युफ्रेट्स उपत्यकामा सरकारी सुरक्षाकर्मीविरुद्ध गरेको आक्रमणमा सरकारी बल तथा सरकार पक्षधर स्थानीय लडाकु समूहका ४५ जनाको मृत्यु भएको हो । उक्त उपत्यकालाई सरकारी फौजले रूसी हवाई आक्रमणको सहयोगमा गत वर्ष आफ्नो नियन्त्रणमा लिन सफल भएको थियो ।
विद्रोहीले निशाना बनाएका ग्रामीण बस्तीहरू प्रान्तीय राजधानी देर अजोर तथा अबलु कमल शहर इराकी सिमानामा पर्ने शहरहरू हुन् । उक्त गाउँहरूको बीच भागमा अहिले पनि आइएस विद्रोहीको प्रभाव क्षेत्र रहेको हाजिन शहर पनि पर्छ । मानव अधिकारवादी संस्थाका प्रमुख अब्देल रहमानले दिएको जानकारीअनुसार सरकारी पक्ष र विद्रोहीबीचको झडपमा २६ जना आइएस लडाकु पनि मारिएका छन् । सरकारी पक्षधर समूहमा परेका प्राय सिया लडाकु भए पनि उनीहरू इराकी, अफगानी तथा लेबनानी नागरिकसमेत रहेको उनले बताए । एएफपी
प्रतिक्रिया दिनुहोस !
