डलर दसैंपछि मात्र ल्याइने
काठमाडौः नेपाल राष्ट्र बैंकले चार महिनलाई पुग्ने डलर मौज्दात रहेको भन्दै दसैंपछि मात्र ल्याउने जानकारी दिएको छ । बजारमा डलरको हाहाकार भएपछि लामो गृहकार्यपछि नेपाल राष्ट्र बैंकले सिंगापुरबाट एक करोड अमेरिकी डलर ल्याउने निर्णय गरेको हो ।
‘अभावसँगै डलरको माग अधिक भएको र राष्ट्र बैंकसँगको मौज्दात कम हुन लागेपछि सिंगापुरको सीआईएमबी बैंकबाट आफ्नो खातामा रहेको डलर ल्याउन लागिएको नेपाल राष्ट्र बैंकका सहायक प्रवक्ता राजेन्द्र पण्डितले बताए । ‘हामीसँग अझै अझै चार महिनालाई पुग्ने डलर मौज्दात छ,’ उनले भने, ‘त्यसैले दसैंपछि मात्र हामी डलर ल्याउँछौं ।’
दसैंअघि डलर ल्याउने प्रक्रिया मिलाउने उनको भनाइ छ । डलर ल्याउन लाग्ने खर्च, बिमा, डलर ल्याउन हुन सक्ने सम्भावित जोखिमलगायतमा छलफल गरी राष्ट्र बैंक बैंकिङ कार्यालयका प्रमुख कार्यकारी सिंगापुर गएर डलर ल्याउने प्रक्रिया मिलाएर आउने पण्डितले बताए । सिंगापुरबाट डलर ल्याउँदा २० हजार अमेरिकी डलर खर्च लाग्ने अनुमान राष्ट्र बैंकको छ ।
यसरी डलर ल्याउँदा सिंगापुरबाट त्रिभुवन अन्तर्राष्ट्रिय विमानस्थलसम्मको बिमा र पारवाहन खर्च सीआईएमबीले व्यहोर्ने भएको छ । यस विषयमा दुई पक्षबीच अनौपचारिक सहमति भए पनि औपचारिक सम्झौता हुन बाँकी रहेको उनले बताए ।
राष्ट्र बैंक र सीआईएमबीबीच सम्झौता गन राष्ट्र बैंकको बैंकिङ कार्यालयका प्रमुख जनकबहादुर अधिकारी सिंगापुर जानेछन् । राष्ट्र बैंकले डलर ल्याउने निर्णय गरेसँगै वाणिज्य बैंकलाई पनि नगद डलर ल्याउन स्वीकृति दिएको छ ।
निजी बैंक हिमालयन, नविल, स्टान्डर्ड चार्टर्ड र नेपाल इन्भेस्टमेन्ट बैंकले विदेशबाट नगद डलर ल्याउने इच्छा गरेका थिए । त्यसमध्ये स्टान्डर्ड चार्टर्ड बैंक नेपालले पनि एक करोड अमेरिकी डलर नगद ल्याउने स्वीकृति मागेको राष्ट्र बैंकले बताएको छ । निजी वाणिज्य बैंकलाई पनि विनियम दर निर्धारण व्यवस्था अन्तरगत कारोबार गर्ने गरी नगद डलर ल्याउन स्वीकृति दिएको पण्डितले जानकारी दिए ।
प्रतिक्रिया दिनुहोस !
