पोखरा ः जिल्ला अदालत कास्कीले कांग्रेस कास्कीका नेता रामजी पौडेल (बादल) हत्याकाण्डका ६ अभियुक्तलाई जन्मकैदको फैसला सुनाएको छ । जिल्ला न्यायाधीश उमेश लुईंटेलको इजलासले ६ जनालाई जन्मकैद र ६ जनालाई जनही एक वर्ष जेल सजायको फैसला सुनाएको निमित्त श्रेस्तेदार मोहनबादुर अधिकारीले जानकारी दिए । तीन दिनको बहसपछि आइतबार जिल्ला अदालत कास्कीले उक्त फैसला सुनाएको हो ।
हत्यामा संलग्न मुख्य दोषी प्रकाश गुरुङ, विश्वाश गौतम, राजु रानाभाट, रवीन केसी, बले भनिने अशोक गुरुङ र सन्दीप गुरुङलाई जन्मकैदको फैसला सुनाइएको अधिकारीले जानकारी दिए । उनका अनुसार उनीहरू सबै २०७२ भदौदेखि पुर्पक्षमा थुनामा छन् । उनीहरूविरुद्ध सवस्र्वसहित जन्मकैदको मागदाबी थियो ।
घटनाबारे थाहा पाएर पनि उजुरी नगरेको र मतियारका रूपमा काम गरेको आरोपमा ६ जनालाई अदालतले एक वर्षको सजाय सुनाएको छ । निमित्त श्रेस्तेदार अधिकारीका अनुसार भरत पौडेल, वीरेन्द्रकुमार रानाभाट, रवीन क्षत्री, भीमबहादुर घले, चन्द्रबहादुर थापा र लालबहादुर सेन ठकुरीलाई एक वर्ष कैद सजाय सुनाइएको हो । मतियारको आरोप लागेका ब्रजेश गुरुङ फरार रहेकाले उनको अंश रोक्का राखी मुद्दा मुल्तवीमा राखिएको अधिकारीले बताए । यीमध्ये पाँच जनालाई जिल्ला अदालतले ०७२ भदौमै पुर्पक्षका लागि थुनामा पठाए पनि उच्च अदालत पोखराको आदेशबाट जनही २५ हजार रुपैयाँ धरौटीमा छुटेका थिए । त्यतिबेला जिल्ला अदालतले पुर्पक्षका लागि थुनामा पठाएपछि मुख्य आरोपीसहित उनीहरूले उच्च अदालतमा निवेदन दिएका थिए ।
तत्कालीन लेखनाथ नगरपालिका वडा नं १२ गगनगौडामा पार्टीको आन्तरिक छलफलमा सहभागी भई घर जाने क्रममा ०७२ साउन २८ गते राति नेता बादलको हत्या भएको थियो । हत्यापछि परिवारका तर्फबाट विश्वास गौतम, राजु रानाभाट, प्रकाश गुरुङ, रवीन केसी र कांग्रेस तत्कालीन लेखनाथ नगरसभापति राजेन्द्रमणि लामिछानेलगायतविरुद्ध किटानी जाहेरी परेको थियो । जिल्ला सरकारी वकिल कार्यालयले लामिछानेविरुद्ध प्रमाण नभेटिएको भन्दै मुद्दा चलाउन आधार नभएको बताएपछि हिरासतमुक्त भएका थिए । उनी ०७२ साउन ३० गते पक्राउ परेकामा उनीहरू भदौ २३ गते छुटेका थिए ।
प्रतिक्रिया दिनुहोस !
