स्कुलमै पर्यो चट्याङ, पढिरहेका दुई विद्यार्थीको मृत्यु
जेठ २७, २०७५ आइतबार १७:४२:०
वीरेन्द्रनगरः यहाँको एक विद्यालयमा पढिरहेका विद्यार्थीमाथि चट्याङ्ग पर्दा दुईजनाको ज्यान गएकोे छ । चिंगाड गाउँपालिका–४ मटेलाको प्राथमिक विद्यालय धनापानीमा चट्याङ्ग पर्दा दुई विद्यार्थीको मुत्यु भएको छ भने अन्य सातजना घाइते भएका छन् ।
आइतबार बिहान ११ बजेतिर कक्षामा दोस्रो विषय अध्ययन गरिरहेकै अवस्थामा तीव्र वर्षासँगै परेको चट्याङ्गबाट मेटलाका ७ वर्षीय अम्बरबहादुर चन्द र अर्की ७ वर्षीया निर्मला चन्दको मृत्यु भएको हो ।
कक्षामा पढाइरहेका बेला टिनको छानमाथि एक्कासी चट्याङ्ग परेपछि दुईजनाको घटनास्थलमै मृत्यु भएको स्थानीय समाजसेवी डोरप्रसाद शर्माले जानकारी दिए ।
चट्याङ्गबाट घाइते सातमध्ये पाँचजनाको मटेला स्वास्थ्य चौकीमै सामान्य उपचारपछि घर फर्काइएको छ भने, दुईजनाको उपचार भइरहेको छ । कक्षा दुईमा अध्ययनरत ६ वर्षका निर्मल चन्द र पाँच वर्षीया पवित्रा शाहीको उपचार भइरहेको जिल्ला प्रहरी कार्यालय सुर्खेतले जनाएको छ । चट्याङ्गबाट विद्यालयमा समेत क्षति पुगेको छ ।
प्रतिक्रिया दिनुहोस !
