दमक : झापाको दमक नगरपालिकाका प्रमुख रोमनाथ ओली सवार गाडीमा राखिएको बम निष्क्रिय पारिएको छ ।
नेपाली सेनाको बम डिस्पोजल टोलीले बिहीबार बिहान बम निष्क्रिय बनाएको हो । निष्क्रिय गरिएको बम ३३ डेटोनेटर रहेको नेपाली सेनाको बम डिस्पोजल टोलीले जानकारी दिएको छ ।
नगर प्रमुख ओलीका अनुसार बुधबार राति कार्यालयबाट फर्कने क्रममा नगरपालिकाको स्कारपियो गाडीको छतमा कार्टुन जस्तो चिजमा शंकास्पद वस्तु फेला परेको थियो । उनले शंकास्पद वस्तु गाडीमा देखेपछि तत्काल प्रहरीमा खबर गरेका थिए ।
बमलाई ओली निवासको सुरक्षामा खटिएका सुरक्षाकर्मीले राति ८ बजेतिर सुरक्षित स्थानमा लगेर राखेका थिए । त्यसलाई बिहीबार बिहान नेपाली सेनाको बम डिस्पोजल टोलीले निष्क्रिय पारेको इलाका प्रहरी कार्यालय दमकका प्रहरी नायब उपरीक्षक दीपक गिरीले जानकारी दिए ।
बम कसले राखेको भन्ने बारे थाहा हुन सकेको छैन । यसअघि पनि ओली निवासमा बम विष्फोट भएको थियो । त्यस्तै, एक महिना अघिमात्र दमक–७ का वडाध्यक्ष भीम पौडेलको घरमा बम विस्फोट भएको थियो । बम राख्ने समूहको भने अझैसम्म पहिचान हुन सकेको छैन । दमक–६ स्थित प्रधानमन्त्री केपी शर्मा ओलीको घरमा नगर प्रमुख ओली बस्दै आएका छन् ।
प्रतिक्रिया दिनुहोस !
