जाजरकोट : नेपाल प्रहरीले जाजरकोटका टोलटोलमा सामुदायिक प्रहरी अभियान सञ्चालन गरेको छ । समुदाय र प्रहरीबीचको सम्बन्ध सुमधुर बनाउन टोलटोलमा प्रहरी अभियान सञ्चालन गरिएको हो ।
गृह मन्त्रालयको निर्देशनमा प्रहरी प्रधान कार्यालयको देशव्यापी कार्यक्रमअनुसार टोलटोलमा प्रहरी अभियान सञ्चालन गरिएको जिल्ला प्रहरी कार्यालय जाजरकोटका प्रहरी नायब उपरीक्षक रवीन्द्रबहादुर सिंहले जानकारी दिए ।
गाउँगाउँमा प्रहरी अभियान अवधिमा जिल्लाका विभिन्न ठाउँ सडक तथा ट्राफिक नियम पालना, वातावरण संरक्षण, घरेलु हिंसा, मानव बेचबिखन तथा ओसारपसार, धुम्रपान र मद्यपान, सामाजिक अपराध, साइबर अपराध, बालविवाह, छाउपडी प्रथा, बाढीपहिरो, आगलागी तथा अपराध रोकथाममा केन्द्रित रहेर जनचेतनामूलक कार्यक्रम सञ्चालन गरिने प्रहरी नायब उपरीक्षक सिंहले बताए । उनले भने, ‘अभियान टोलटोल र विद्यालयकेन्द्रित हुनेछ । यस कार्यमा स्थानीयको सहयोग लिइनेछ ।
त्यस्तै प्रहरीले जिल्लाका सातै स्थानीय सरकारको सहयोग र समन्वयमा अभियान अघि बढाउने जनाएको छ । स्थानीय तहमा रहेका न्यायिक समितिहरू, आमा समूह, युवा र विद्यार्थीलाई प्रहरीको यस अभियानमा सरिक गराउने कार्यक्रम रहेको छ । ‘युवाहरूलाई कुलतमा लाग्न नदिन र आपराधिक गतिविधि रोक्ने यस अभियानको मुख्य उद्देश्य हो । त्यसका साथै सामाजिक विकृति र विसंगति हटाउन पनि प्रहरी सक्रिय रहनेछ’, डीएसपी सिंहले भने ।
अभियानकै अवधिमा घटित घटना तथा अपराध अनुसन्धानमा सहयोग, घटनास्थल सुरक्षा र आकस्मिक सहयोग समन्वय र उद्धार, फरार अपराधी तथा आपराधिक व्यक्तिहरू र उनीहरूको बासस्थान पहिचान, पीडितहरूको संरक्षण, उद्धार र सहयोग, साक्षीहरूको वास्तविक अवस्थाको जानकारी, समन्वय संरक्षण, दुर्घटना तथा प्रकोप उद्धार व्यवस्थापनमा केन्द्रित रहने प्रहरीले जनाएको छ ।
प्रतिक्रिया दिनुहोस !
