हुम्लाको नेप्कामा बाढी : गोठ, विद्यालयसहित खेती योग्य जमिनमा ठूलो क्षति, तत्काल राहत पुर्याउन सरकारलाई ध्यानाकर्षण
जेठ ७, २०८३ बिहीबार ८:८:४८
कालीबहादुर थापा। हुम्ला : हुम्लाको चंखेली गाउँपालिका–५ नेप्का गाउँमा आएको बाढी पहिरोले ठूलो क्षति पुगेको छ। मंगलबार राती एक्कासी असिना–पानी सहितको बाढीले गोठ, डाँफे आधारभूत विद्यालय भवन र १५ रोपनी खेती योग्य जमिनमा क्षति पुर्याएको चंखेली गाउँपालिका वडा नम्बर ५ का स्थानीय छक्कबहादुर तामाङले बताए।
वडाध्यक्ष हर्कधन तामाङ र धनसिंह तामाङका गोठ पनि पहिरोले पुरेको छ। त्यसबाट ५३ वटा भेँडा बाख्रामा क्षति पुगेको छ। वडा अध्यक्ष तामाङका अनुसार विद्यालयका ३ वटा भवन भत्काएको छ। स्थानीय धन्सिंह तामाङको बाख्रागोठ बगाउँदा ९३ वटा बाख्रा बगाएको छ। यसैगरी करिब ७० घरधुरीका खेतीयोग्य जमिनमा लगाएको बालीनाली सखाप पारेको छ।
वडामा ल्याएको खानेपानीको ट्ङ्की ( ८ हजार घनमिटर) र ७ मिटर खानेपानीको पाइप पनि बगाएको र कादुरी नामक संस्थाले निर्माण गरेको माइक्रोहाइड्रोको मुहान बगाएको बताइएको छ। डाँफे आधारभूत विद्यालयको ५ कोठे भवन भत्किएपछि विद्यालयको कम्युटर, प्रिन्टर, लगायतका सम्पूर्ण सामाग्री नष्ट भएको डाँफे आधारभूत विद्यालयका प्रधानाध्यापक बलि तामाङले जानकारी दिए।
सुरक्षा व्यवस्थापनको टोलीले गर्यो अनुगमन
घटनालगत्तै प्रमुख जिल्ला अधिकारी टेक कुमार रेग्मी नेतृत्वको टोलीले बुधबार स्थलगत अनुगमन गरेको छ। सदरमुकामबाट फिस्टेल हेलिकोप्टरमार्फत बाढी पहिरो गएको स्थान नेप्कामा अनुगमन गरिएको जिल्ला प्रहरी कार्यालय पप्रमुख डीएसपी शंकर खड्काले बताए। उनका अनुसार आफ्नो टोली बाढी पहिरो गएको स्थलमा गइ अनुगमन गर्दा नागरिकको थुप्रै क्षति भएको र खेतीयोग्य जमिनमा लगाएको बाली बगाउँदा खानलाई समस्या हुने देखिएको बताए।
यता प्रहरी मुचुल्काको लागि गएको टोली ६ घण्टापछि पुगेको छ। हुम्ला सदरमुकाम सिमकोटदेखि उत्तरपूर्वमा रहेको चंखेली गाउँपालिकाको तल्लो पाली, माथिल्लो पाली, पिप्लाङ र नेप्का गरी चार गाउँमध्ये गाउँपालिकाको केन्द्र पिप्लाङभन्दा निकै टाढा रहेको नेप्का गाउँ करिब ५ घण्टा पैदल हिँडेर जानुपर्ने बाध्यता रहेको छ।
पीडितलाई राहत व्यवस्था गर्न सांसदहरूको माग
हुम्ला जिल्लाबाट निर्वाचित प्रतिनिधि सभा सदस्य जयपति रोकायाले नेप्का गाउँका बाढी पीडित परिवारलाई तत्काल राहत र क्षतिपूर्तिको व्यवस्था गर्न सरकारसँग माग गरे।
सांसद रोकायाले प्रतिनिधि सभाको बैठकमा हुम्लाको नेप्का गाउँमा आकस्मात भीषण असिना पानीसहित आएको बाढीले पुर्याएकाले तत्काल राहतको व्यवस्था गर्न सरकारसँग जोडदार माग गरे।
यस्तै नेकपा (एमाले) की सांसद यशोदाकुमारी बरालले हुम्लाको चंखेली गाउँपालिकामा गएको भीषण पहिरोका पीडितलाई तत्काल राहत र क्षतिपूर्तिको व्यवस्था गर्न सरकारसँग माग गरिन्। प्रतिनिधि सभाको बुधबारको बैठकमा बोल्दै सांसद बरालले प्राकृतिक विपत्तिका कारण भएको क्षतिप्रति दु:ख व्यक्त गर्दै सरकारको ध्यानाकर्षण गराएकी हुन्।
‘भीषण पहिरोका कारण विद्यालय र गाउँबस्तीमा ठूलो क्षति पुगेको छ, सरकारले प्रभावित क्षेत्रमा छिटोभन्दा छिटो राहतको प्रबन्ध मिलाउनुपर्छ,’ उनले भनिन्, ‘सदनमा पुराना दलहरूले केही गरेनन् भन्दै ‘सदन गनायो’ जस्ता अमानवीय र अशिष्ट शब्दहरू प्रयोग भइरहेका छन्। यस्ता शब्दहरू तत्काल संसदको रेकर्डबाट हटाइनुपर्छ।’
प्रतिक्रिया दिनुहोस !
