दमौलीः आँबुखैरेनी गाउँपालिका–१ बरादीमा यात्रु बससँग दुई सवारी साधन ठोक्किँदा चारजनाको मृत्यु भएको छ । आँबु–४ निवासी २६ वर्षका डिलबहादुर थापाको उपचारका क्रममा दमौली अस्पतालमा ज्यान गएपछि मृतकको संख्या चार पुगेको हो ।
यसैगरी पर्वतको कुश्मा नगरपालिका–९ निवासी तीन वर्षकी ममता लामिछाने र कुश्मा–९ का २५ वर्षका कमल लामिछानेको गण्डकी मेडिकल कलेज पोखरामा मृत्यु भएको छ ।
त्यसैगरी आँबु–४ का २८ वर्षीय नुनबहादुर खवासको मणिपाल शिक्षण अस्पतालमा उपचारका क्रममा मृत्यु भएको ट्राफिक प्रमुख कृष्णबहादुर क्षेत्रीले जानकारी दिए ।
घटनामा तीनजना घाइते भएका छन् । पृथ्वीराजमार्गमा भएको दुर्घटनामा आँबुखैरेनीबाट डुम्रे आउँदै गरेको ग १ ख ३०७३ नम्बरको बसले डुम्रेबाट आँबुखैरेनी जाँदै गरेका बा १७ च १८१४ नम्बरको भ्यान र ग ५ प १९४४ नम्बरको मोटरसाइकललाई ठक्कर दिएको इलाका प्रहरी कार्यालय आँबुखैरेनीका निरीक्षक सन्तोष रोकाले बताए ।
दुर्घटनामा घाइते हुने सबै भ्यान र मोटरसाइकलका यात्रु हुन् । घाइते हुनेहरुमा मृतक ममताकी आमा २० वर्षीया पार्वती लामिछाने, चितवन भरतपुर–६ निवासी २० वर्षीया सरु पाठक, पर्वत कुश्मा–१३ निवासी २४ वर्षीय गुरुदत्त तिवारी छन् ।
यसैगरी पर्वत खुर्कोटकी ३९ वर्षीया सीतादेवी चालिसे र नवलपरासी सुस्ताका ३५ वर्षीय आनन्त तिवारी पनि घटनामा घाइते छन् । एकै पटक तीन सवारी ठोक्किँदा केहीबेर राजमार्ग अवरुद्ध भएको थियो । अवरुद्ध राजमार्ग प्रहरीले खुलाएको छ ।
प्रतिक्रिया दिनुहोस !
