पोखरा : महानगरको नाम हेरफेर गर्न सिफारिस गर्ने प्रस्ताव सर्वसम्मत पारित गर्दै पोखरा लेखनाथ महानगरपालिकाको नगर सभा मंगलबार सकिएको छ । सभाले महानगरको नामबाट लेखनाथ शब्द हटाई पोखरामात्रै राख्न प्रदेश सरकारलाई सिफारिस गर्ने प्रस्ताव पारित गरेको प्रमुख प्रशासकीय अधिकृत शेषनारायण पौडेलले जानकारी दिए । वडा नम्बर १९ का अध्यक्ष तथा नेपाल कम्युनिस्ट पार्टीका सचेतक शोभामोहन पौडेलले सोमबार पेस गरेको प्रस्तावलाई वडा नम्बर ९ का अध्यक्ष तथा नेपाली कांग्रेसका नेता रामराज लामिछानेले समर्थन गरेका थिए । उक्त प्रस्तावमाथि मंगलबार झन्डै ४० सभासदले विचार राखेको जानकारी पनि प्रमुख प्रशासकीय अधिकृत पौडेलले दिए ।
साविक लेखनाथ नगरपालिका क्षेत्रबाट प्रतिनिधित्व गर्ने वडाध्यक्ष र सदस्यहरुले छलफलमा भाग लिँदै अहिलेकै नाम ठिक रहेको विचार राखेका थिए । तर सभाको अन्त्यतिर मेयर मानबहादुर जिसीले पोखरा महानगरपालिका मात्रै कायम राख्न गरेको प्रस्तावमा भने उनीहरुले पनि सहमति जनाएका हुन् । ‘मेयरसाबले सबै जिम्मेवारी म लिन्छु, नाम फेरौं भन्नुभयो’, वडा नम्बर ३० का अध्यक्ष श्रीराम पोखरेलले अन्नपूर्णसँग भने, ‘लेखनाथको अस्तित्व कहिँ न कहिँ हुनुपर्छ भन्यौं ।’ अन्तर्राष्ट्रिय विमानस्थल वा पोखरा विश्वविद्यालयको नाम कविशिरोमणि लेखनाथको नाममा हुनुपर्ने माग लेखनाथ क्षेत्रका जनप्रतिनिधिले राखेका थिए । अन्तर्राष्ट्रिय ख्यातिप्राप्त नाम पोखरा भएको हुँदा महानगरको नाम त्यसैबाट राख्नुपर्ने माग स्थानीय स्तरमा उठ्दै आएको थियो । दुई शब्दको नाम लामो र झन्झटिलो भएको पनि गुनासो थियो ।
१६७ सदस्यीय महानगर कार्यपालिकामा नेकपा र कांग्रेसबाहेक अरु कुनै पनि पार्टीका सदस्य छैनन् । दुवै दल उक्त प्रस्तावको पक्षमा देखिएपछि नाम हेरफेरको प्रस्ताव पारित भएको हो । स्थानीय तहको नाम हेरफेर गर्न कार्यपालिकाको २÷३ मतले पारित गर्नुपर्ने संवैधानिक व्यवस्था छ । कार्यपालिकाले पारित गरेको प्रस्ताव प्रदेश सरकारलाई पठाएपछि उसको सिफारिसमा संघीय सरकारले सदर गरेर राजपत्रमा प्रकाशन गरेपछिमात्रै नाम हेरफेर हुन्छ । २०७३ साल फागुनमा पोखरा उपहानगर पालिका र लेखनाथ नगरपालिकालाई मिलाएर राज्य पुनःसंरचना आयोगले पोखरा लेखनाथ महानगरपालिका बनाएको थियो । महानगरपालिकाको नगर सभाले बजेट पनि मंगलबारै सर्वसम्मत पारित गरेको जानकारी प्रमुख प्रशासकीय अधिकृत पौडेलले जानकारी दिए ।
प्रतिक्रिया दिनुहोस !
